Jumysshylardyń qaýipsizdigi – basty nazarda - Maǵzum Myrzaǵalıev
Maǵzum Myrzaǵalıev kásiporyn basshylarynyń atqarǵan qyzmeti men jumys jospary týraly baıandamalaryn tyńdap, erekshe nazarǵa alatyn máselelerge toqtaldy. Áýeli «Ózenmunaıgaz», «Mańǵystaýmunaıgaz» jáne «Qarajanbasmunaı» AQ basshylyǵyna jyl sońyna deıin munaıdy óndirý jáne tapsyrý josparynyń tolyqqandy oryndalýyn qamtamasyz etý júkteldi.
Bul basqosýda eńbek qaýipsizdigin qamtamasyz etý jáne óndiristegi jaraqattaný deńgeıin tómendetý máseleleri erekshe nazarǵa alyndy. Maǵzum Myrzaǵalıev munyń enshiles kásiporyndardyń basshylary úshin basty mindet ekenin aıta otyryp, máseleni qatań baqylaýda ustaýdy tapsyrdy.
Óńirdegi áleýmettik turaqtylyqty saqtaý maqsatynda «Qazmunaıgaz» UQ Basqarma tóraǵasy eńbek ujymdarymen turaqty túrde kezdesip turý kerektigin basa aıtty. Basty mindet – eńbek zańnamasynyń qatań saqtalýy.
«Bul – jumys berýshige de, jumysshylarǵa da ortaq talap. Eńbek tártibindegi olqylyqtar men ereje buzýshylyqtardy tejep, jaýapty basshylar tarapynan bul máselege salǵyrt qaraýǵa jol bermeý qajet», - dep atap ótti Maǵzum Myrzaǵalıev.
Jıyn barysynda «Ózenmunaıgaz» AQ basshylyǵyna óndiris oryndaryndaǵy elektr energııasynyń apattyq ajyratý máselesin jýyq arada sheshý mindetteldi. Bul - mejelengen josparlyq kórsetkishterge jetýge zor yqpalyn tıgizetin mańyzdy faktorlardyń biri ekeni eskertildi.
Myrzaǵalıev jańa uńǵymalardy burǵylaý protsesin jaqsartý men munaı alý koeffıtsıentin arttyrý úshin ǵylymı ınstıtýttarǵa júginý jáne zamanaýı ǵylymı-óndiristik ádisterdi qoldaný qajettigine de toqtaldy.
Basqarma tóraǵasy Qarajanbas ken ornyndaǵy sý tuşytý zaýytyn paıdalanýǵa berý merzimin keshiktirý máselesine mán berdi. Zaýytty iske qosý jumysy jedeldetilýi tıis.
Jıyn sońynda Maǵzum Myrzaǵalıev barlyq enshiles jáne táýeldi uıym basshylaryna bir kózden satyp alý kólemin azaıtý máselesin qolǵa alý kerektigin aıtty.