Jumysshylardyń eńbek quqyǵyn qorǵaýǵa erekshe nazar aýdarý qajet –Tamara Dúısenova

ATYRAÝ. QazAqparat – Eńbek jáne halyqty áleýmettik qorǵaý mınıstri Tamara Dúısenova Atyraý oblysyndaǵy «Teńizshevroıl» JShS bazasynda keńes ótkizdi. Jergilikti atqarýshy bılikti jumyskerlerdiń eńbek quqyǵyn qorǵaý, janjaldardy boldyrmaý máselesine erekshe nazar aýdarýǵa shaqyrdy, dep habarlaıdy QazAqparat.

Mınıstrdiń deregine súıensek, Atyraý oblysynda 9,5 myńnan astam kásiporyn men mekeme jumys isteıdi. Onda 278 myń jaldamaly qyzmetker eńbek etedi.

Óńirde kompanııalardaǵy 242 myń jumyskerdi qamtı otyryp, jumys oryndaryn saqtaý boıynsha 3,7 myń memorandýmǵa jqol qoıylǵan. Іri jáne orta kásiporyndardyń 97,8 paıyzy qyzmetkerlerimen ujymdyq sharttar jasasqan.

Oblysta 109 kásiporyn jalaqysy tómen 108 myń qyzmetkerlerdiń jalaqysyn 5-ten 50%-ǵa deıin kótergen. Alaıda, eńbek janjaldarynyń týyndaý qaýpi joıylmaǵan kásiporyndar bar.

«Jergilikti atqarýshy organdar eńbek janjaldarynyń aldyn alýǵa jáne jol bermeýge tıis. Jumys berýshilerdiń ujymdyq sharttar men memorandýmdarǵa sáıkes jumys oryndaryn saqtaý jónindegi mindettemelerin oryndaýyna turaqty monıtorıng jasalyp otyrý kerek. Jumysshylar eńbek jaǵdaılary men jalaqy deńgeıine únemi saýalnama júrgizý qajet», -dedi Tamara Dúısenova.

Mınıstrdiń aıtýynsha, munaıly óńirde jalaqy qaryzy joıylmaǵan kásiporyndar áli de bar. Qazir 9 kásiporynda jalpy somasy 34 mln teńgeni quraıtyn eńbekaqy bereshegi bar.

«Ákimdik oblystyq prokýratýra, qarjy jáne ádilet organdarymen birlesip, jalaqy, áleýmettik aýdarymdarǵa qatysty bereshekti óteýdiń egjeı-tegjeıli jospar-kestesin ázirleýi qajet. Soǵan sáıkes jalaqy jónindegi yqtımal bereshekti anyqtaý, jumyskerlerdi jumystan bosatý, áleýmettik aýdarymdardy tóleýdiń tómendeýine monıtorıng júrgizilgeni jón», -dedi Tamara Dúısenova.

Mınıstr sheteldik jumys kúshin tartatyn jumys berýshilerdi tekserý kezindegi anyqtalǵan buzýshylyqtarǵa toqtaldy. Zań buzýshylyqqa jol bergen jumys berýshilerge pármendi sharalar qabyldap, óńirlik úshjaqty komıssııada tekserý nátıjelerin qaraýdy usyndy. Bıyl óńirde óndiriste 21 qyzmetker zardap shekken. Onyń 3-eýi qaza tapqanyn atap ótti.

«Oblys ákimdigi eń kóp jazataıym oqıǵalarǵa jol bergen jumys berýshiniń árqaısysymen qaýipsiz eńbek jaǵdaılaryn qamtamasyz etý jónindegi is-sharalar josparyn ázirlep, oryndalýyn mindetti túrde baqylaýy qajet. Memlekettik eńbek ınspektorlary óndiristik jaraqat alýdy azaıtý maqsatynda kásiporyndarǵa barý arqyly profılaktıkalyq baqylaý jumystaryn kúsheıtkeni jón», -dedi Tamara Dúısenova.

Foto: gov.kz