Jumysshylar eń tómengi kúnkóris deńgeıiniń zaman talabyna saı emes ekenin anyqtady

ASTANA. QazAqparat - Jaqyn arada Qazaqstannyń kásipodaqtary jumysshylar arasyndaǵy saýalnamanyń nátıjesinde anyqtalǵan qazirgi eń tómengi kúnkóristiń deńgeıin jarııalaýdy josparlap otyr, dep habarlaıdy QazAqparat tilshisi.

"Búginde kóptegen áleýmettik mańyzy bar tólemderdi esepteý kezinde xalyqtyń eń tómengi kúnkóris deńgeıiniń kólemi eskeriledi. Atalǵan kórsetkish sońǵy jeti jylda qaıta qaralǵan joq. Memleket basshysynyń aıtýynsha, 2018 jylda ony taǵy qarastyratyn bolady. Biz, kásipodaqtar osy problemany sońǵy bir jarym jyl boıy zerdelep kelemiz. Osyǵan baılanysty Qazaqstannyń barlyq oblystarynda saýalnama júrgizip, 1500-den astam anketany jınap aldyq. Osy anketalardy zerdeleý kezinde qazirgi eń tómengi kúnkóris deńgeıiniń zaman talabyna saı emes ekenine kóz jetkizdik. Suranys ta basqa, jaǵdaı da ózgerdi. Jaqyn arada biz ózimiz anyqtaǵan kúnkóris deńgeıin Úkimettiń qaraýyna usynatyn bolamyz", - dedi QR Kásipodaqtar federatsııasynyń tóraǵasy Ábilǵazy Qusaıynov Ortalyq kommýnıkatsııalar qyzmetinde ótken baspasóz máslıxatynda.

Federatsııa basshysy jumysshylardyń eseptep shyǵarǵan eń tómengi kúnkóris deńgeıiniń kólemin jarııalaǵan joq. Onyń aıtýynsha, barlyq esepter aıaqtalǵannan keıin aldymen ol aqparat Úkimetke joldanady. "Shamamen, birinshi jartyjyldyqta biz osy jumysty aıaqtaıtyn bolamyz", - dep atap kórsetti federatsııa basshysy.