Jumysshy kentindegi 873 úı ortalyqtandyrylǵan sý júıesine qosylady - Qaraǵandy
Qubyrlar uńǵymalardy paıdalanyp, aýyz sý alyp otyrǵan 873 otbasynyń úılerine tartylady. Osylaısha, búkil aýyl ortalyq sýmen jabdyqtaýǵa qosylady.
Merdiger kompanııa «Dáneker» JShS kesteden edáýir alda keledi.
«Qurylys osy jyldyń mamyr aıynda bastalǵan bolatyn. Sý qubyrynyń uzyndyǵy – 15,8 shaqyrym. Qazir biz 1 km 300 metrdi aıaqtap, sodan keıin syǵymdaý men jýýdy bitirýimiz kerek. Tóseý KBB (kóldeneń baǵyttalǵan burǵylaý) ádisimen júrgiziledi. Topyraqtyń betin ashpaı, biz jerdi tesip, qubyrdy sozamyz», – deıdi kompanııanyń tehnıkalyq dırektory Andreı Sızev.
Aýyz sý qubyrlary 16 kósheniń turǵyndaryna jetkiziledi.
«Nurly jer» baǵdarlamasy boıynsha Prıshahtınskidegi oramishilik sý qubyry jelilerin aýystyrýdyń kezekti kezeńi júrip jatyr. Joba 2020 jyly bastaldy.
Bıylǵy jyldyń sońyna deıin 29 shaqyrym jańa jeli tóseýdi aıaqtaý josparlanyp otyr. Nátıjesinde 65 myń tutynýshy sapaly sýmen qamtamasyz etiledi.
«Mundaǵy jelilerdiń tozýy 65-70%-dy qurady. Jumys aıaqtalǵannan keıin sýdyń sapasy men gıdravlıkalyq fon jaqsarady. 2025 jylǵa deıin taǵy 30 shaqyrym qubyrdy aýystyrýdy josparlap otyrmyz», – dep atap ótti «Qaraǵandy Sý» bas dırektory Danııar Isaev.
Bıyl jańa qalanyń (Álıhanov, Erýbaev, Jaýynger-Internatsıonalıster, Buqar jyraý dańǵyly), Mıhaılovka jáne Aqtas kentiniń tutynýshylary úshin magıstraldy sý tartqyshyn jóndeý aıaqtalady. Joba Óńirlerdi damytýdyń memlekettik baǵdarlamasy aıasynda júzege asyrylady jáne birinshi kúrdelilik sanatyna jatady. Bul sý qubyrlaryn tóseý kezinde jumys istep turǵan kóptegen kommýnıkatsııalardyń kedergi etýine baılanysty.
«Qoldanystaǵy bolat qubyrlarǵa biz jańa polıetılendi qubyrlardy qosyp, salyp jatyrmyz. Biz KBB ádisin qoldanamyz. Men ózim qaraǵandylyqpyn jáne qalada mundaı jumys kólemi buryn-sońdy júrgizilgen joq dep aıta alamyn. Qyrkúıek aıynda aıaqtaımyz, úsh jylǵa kepildik beremiz. Al, qubyrlardyń ózderi 50 jyldan astam ýaqyt qyzmet etýi kerek», – dep túsindirdi «AlmatyInjStroı» JShS «Saryarqa» fılıaly dırektorynyń orynbasary Igor Saraev.
Uzyndyǵy 8,4 shaqyrym jańa magıstraldy sý tartqyshqa qosylý qazan aıynda ótedi.
Sondaı-aq, Erýbaev kóshesiniń Novoselov kóshesinen Ermekov kóshesine deıingi bóliginde transheıasyz tehnologııa boıynsha sý qubyry aýystyrylýda. Bul ýchaskede qubyrlar 100% tozǵan. Jumystar «Qaraǵandy Sý» ınvestıtsııalyq jobasy boıynsha júrgizilýde. Aıaqtalý merzimi – 2021 jylǵy qazan aıy.