Jumyspen qamtýdyń jol kartasy: Qaraǵandy oblysynda bıyl 19 iri joba iske asyrylady

QARAǴANDY. QazAqparat - Ótken jyly Qaraǵandy oblysynda Memleket basshysy bastamashylyq etken «Jumyspen qamtýdyń jol kartasy» baǵdarlamasy oń nátıje berdi. Bıyl ony júzege asyrý jalǵasady. 2021 jylǵa 19 iri joba josparlanǵan. Shamamen 1 200 jumys orny qurylady, olardyń jartysy turaqty. Bul týraly QazAqparat oblys ákimdiginiń resmı saıtyna silteme jasap habarlaıdy.

Oblys ákimdiginde ótken keńeste JQJK-nyń 2020 jylǵy qorytyndylary men aldaǵy jylǵa arnalǵan josparlary talqylandy.

- 2021 jylǵa Jumyspen qamtý jol kartasy boıynsha 19 joba irikteldi. 17 nysan salynady: 1 bilim berý, 6 densaýlyq saqtaý, 6 sport, 4 TKSh. Taǵy eki nysan qaıta jóndeýden ótedi, - dedi jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekova.

Qaraǵandyda 600 oryndyq jańa mekteptiń qurylysyna qarajat bólindi. Onkologııalyq kómekti jaqsartý úshin operatsııalyq-reanımatsııalyq bloktyń jáne pozıtrondy-emıssııalyq kompıýterlik tomografııa ortalyǵynyń qurylysy bastalady. Sondaı-aq, oblystyq balalar aýrýhanasyn aıaqtaý máselesi sheshildi.

Saran qalasynda ortalyq qazandyq salynyp, burynǵy RTB zaýyty aýdanynda taǵy bir qazandyq salý josparlanýda. Bıyl ortalyqtandyrylǵan qazandyq iske qosylýy tıis Shahanda oramishilik jylý jelileriniń qurylysy qarjylandyrylady. JQJK esebinen Balqashty jylýmen qamtamasyz etý máselesi sheshiledi.

Prıozersk qalasynda tazartý qurylystaryn qaıta jańǵyrtý aıaqtalady. Jańa sport nysandary birqatar qalalar men aýyldyq eldi mekenderde paıda bolady.

- JQJK júzege asyrýda turaqty jumys oryndary men uzaq merzimdi ekonomıkalyq aktıvterdi qurýǵa basa nazar aýdaryldy. Bıyl alǵash ret JQJK aıasynda nesıe berý qarastyrylǵan. Qurylys aıaqtalǵannan keıin paıdalaný kezeńinde 800-den astam adam turaqty jumys oryndaryna ornalastyrylady, - dep atap ótti oblys ákimi Jeńis Qasymbek. - Kóptegen júıeli máseleler bıyl sheshiledi. Birde-bir qala nemese aýyl nazardan tys qalmaıdy. Ol úshin JQJK-dan basqa, túrli memlekettik baǵdarlamalar men oblystyq bıýdjetten qarajat qarastyrylǵan.

2020 jyly Jumyspen qamtý jol kartasy boıynsha oblysta 62 mlrd teńgeniń 624 jobasy júzege asyryldy. 16 myń jumys orny quryldy. Jumyspen qamtý ortalyqtary arqyly 8 myńnan astam adam jumysqa ornalasty.

Baǵdarlamanyń arqasynda mıllıonnan astam adam turatyn 140 eldi mekenniń ınfraqurylymyn jaqsartýǵa múmkindik týdy. 30 jańa nysan salyndy: mektepter, balabaqshalar, zamanaýı modýldi juqpaly aýrýlar aýrýhanasy, dene shynyqtyrý-saýyqtyrý keshenderi jáne t.b. 458 áleýmettik-mádenı nysan, ınjenerlik-kólik ınfraqurylymy jáne turǵyn úı-kommýnaldyq sharýashylyq jóndeldi.

Jergilikti taýar óndirýshiler de qoldaý tapty. Qurylys jáne jóndeý jumystarynda negizinen otandyq materıaldar paıdalanyldy. JQJK iske asyrý jumyssyzdyqtyń tómen deńgeıin saqtaýǵa múmkindik berdi. Nysandarda iske qosylǵan 575 bıznes obektisinde jumys oryndary qamtamasyz etildi.