Jumyspen qamtýdyń Jol kartasy: Almaty oblysyna 109,2 mlrd teńge bólindi
«Ózderińiz biletindeı, Memleket basshysy Qasym-Jomart Toqaev 23 naýryzda Tótenshe jaǵdaı jónindegi memlekettik komıssııanyń otyrysynda «Jumyspen qamtýdyń Jol kartasyn« júzege asyrý úshin 1 trln teńge bólýdi tapsyrdy. Onyń ishinde Almaty oblysyna 109,2 mlrd teńge bólindi. Bul bizdiń óńir úshin óte mańyzdy jáne qajetti qarajat. Birinshi kezekte halyqty jumyspen qamtý máselesin sheshý mańyzdy. Óıtkeni koronavırýsqa baılanysty oblystyń kóptegen turǵyndary jumyssyz qaldy. Olardyń otbasylaryna jaǵdaı jasap, jańa jumys oryndaryn ashý qajet. Buǵan deıin jumys jasaýǵa osyndaı orasan zor qarajat bólingen joq. Sondyqtan biz olardy bólgende jaýapkershilikpen qaraýymyz kerek. Esepti kezdesý, jeke qabyldaýlar kezinde turǵyndar júgingen oblystyń aýdandary men qalalaryna da qarajat bólemiz. Turǵyndardyń barlyq ótinishterin taldap, bólingen qarajatqa mańyzdy jáne qajetti jobalardy júzege asyrý qajet. Joldardy jasaý, áleýmettik nysandardy jóndeý jáne taǵy basqa», - dedi Almaty oblysynyń ákimi Amandyq Batalov.
Jumyspen qamtýdyń jol kartasy aıasynda Almaty oblysynda 27,3 myń jumys ornyn qurýmen 1 240 joba iske asyrylatyn bolady. Óńirde jobalar 4 baǵyt boıynsha júzege asyrylady. Birinshiden, bul áleýmettik nysandardy kúrdeli jóndeý, qaıta jańartý. Mysaly, tek bilim berý salasynda 88 nysan kúrdeli, aǵymdaǵy jóndeýge jatady, al 351 mektepte syrtqy dárethanalardy joıý kerek. Jalpy áleýmettik-mádenı salada 31,8 mlrd teńgege 491 joba iske asyrylatyn bolady. Ekinshiden, turǵyn úı-kommýnaldyq sharýashylyq obektilerin aǵymdaǵy, ortasha, kúrdeli jóndeýden jáne jańartýdan ótkizý qajet. Osy baǵyttaǵy 79 nysan boıynsha 5 myńǵa jýyq jumys ornyn qurý kózdeledi. Oǵan 20 mlrd teńge qarastyrylǵan. Úshinshi baǵyt - bul ınjenerlik-kólik ınfraqurylymyn kúrdeli, ortasha, aǵymdaǵy jóndeý jáne qaıta jańartý. Munda 547 nysan boıynsha 8 500 myń jumys orny qurylmaq, oǵan 34,2 mlrd teńge bólinedi. Tórtinshi baǵyt – eldi mekenderdi abattandyrý. Barlyǵy 153 nysan 17 mlrd teńgege jańartylmaq. Sonymen qatar, ırrıgatsııalyq jelilerdi qaıta jańartýǵa 6,2 mlrd teńge qarastyrylǵan.