Jumyspen qamtý jol kartasy: ShQO-da bıyl 812 joba márege jetpek

ÓSKEMEN. QazAqparat – Shyǵys Qazaqstan oblysynda «Jumyspen qamtý jol kartasy» baǵdarlamasy aıasynda 812 joba máresine jetpek, dep habarlaıdy QazAqparat tilshisi.

Aımaq basshysy Danıal Ahmetovtiń tóraǵalyq etýimen ótken jıyn barysynda «Jumyspen qamtý jol kartasy» baǵdarlamasyn júzege asyrý barysy talqylanyp, osy jylǵy jospardyń nátıjesi qaraldy. Búginde oblysta atalmysh baǵdarlama aıasynda 479 áleýmettik mańyzdaǵy nysan, 87 shaqyrym sý qubyry jelileri, 238 shaqyrym jol men kósheler jóndelip, 79 aýla abattandyryldy. Sonymen qatar Shemonaıhadaǵy dene shynyqtyrý-saýyqtyrý kesheni, Semeı qalasyndaǵy onkologııalyq dıspanserdiń radıologııalyq ortalyǵy, aýdandarda ekipáterli turǵyn úı qurylystary aıaqtalýda.

«Ókinishke qaraı, qalyptasqan epıdemıologııalyq jaǵdaıǵa baılanysty birqatar josparlarǵa túzetýler engizýge týra keldi. Degenmen bıyl oblysta áleýmettik-ekonomıkalyq kórsetkishterdiń oń dınamıkasy saqtalyp otyr. Óńir turǵyndaryn jumyspen qamtýǵa, olardyń zamanǵa saı ınfraqurylymy bar aımaqta ómir súrýine qolaıly jaǵdaı jasaý úshin bar kúsh-jigerimizdi jumsaýymyz qajet. Jobalar josparly merziminde mejesine jetýi tıis», - dedi Danıal Ahmetov.

Osy jyly «Jumyspen qamtý jol kartasy» baǵdarlama aıasynda oblysta 21 myńnan astam jumys orny qurylǵan. 77,4 mlrd teńgege 819 ınfraqurylymdyq joba iske asyrylýda. Aı sońyna deıin josparly 28 joba aıaqtalmaq. Nátıjesinde bıyl 812 joba máresine jetedi, qalǵan jeteýi keler jylǵa ótedi. Bul jyl kóleminde josparlanǵan jumystardyń 99,1 paıyzyn qurap otyr.