Jumyspen qamtý jol kartasy: 64 myńnan astam jumys orny quryldy

NUR-SULTAN. QazAqparat - 2020-2021 jyldarǵa arnalǵan Jumyspen qamtýdyń jol kartasy (JQJK) aıasynda 4 786 jobany júzege asyrý bastalyp, olardyń aýqymynda 64,8 myń jumys orny quryldy, dep habarlaıdy QazAqparat.

Eńbek jáne halyqty áleýmettik qorǵaý mınıstrliginiń málimetinshe, JQJK aıasynda jergilikti atqarýshy oryndar 6 506 jobany iske asyrýǵa iriktedi.

Jol kartasynyń ınfraqurylymdyq jobalaryn iske asyrý 4 negizgi baǵyt boıynsha júrgiziledi: áleýmettik-mádenı nysandardy kúrdeli jáne aǵymdaǵy jóndeý, rekonstrýktsııalaý jáne salý (2 703 joba); turǵyn úı-kommýnaldyq sharýashylyq nysandaryn kúrdeli, ortasha jáne aǵymdaǵy jóndeý, rekonstrýktsııalaý (1 039 joba); ınjenerlik-kólik ınfraqurylymyn kúrdeli, ortasha jáne aǵymdaǵy jóndeý, rekonstrýktsııalaý jáne salý (1 799 joba); eldi mekenderdi abattandyrý (965 joba).

JQJK ınfraqurylymdyq jobalaryn iske asyrý kezinde otandyq óndirýshilerdiń keminde 90% taýarlary men qyzmetterin paıdalanýdy qamtamasyz etý erekshe shart bolyp otyr. Jumysshylardyń kem degende jartysy halyqty jumyspen qamtý ortalyqtary arqyly alynyp, basymdyq jumyssyz júrgen jastarǵa beriletin bolady. Merdigerler sanıtarlyq-epıdemıologııalyq sharalardy qoldana otyryp, qaýipsiz eńbek jaǵdaıyn qamtamasyz etýge tıis.

«26 mamyrdaǵy jaǵdaı boıynsha birqatar óńirde 4 786 joba turǵysynda jumys bastalyp, 64,8 myń jumys orny quryldy», - delingen vedomstvo habarlamasynda.

JQJK aıasynda barlyǵy 255 myń jumys ornyn ashý josparlanýda. Bul rette JQJK jobalary bolashaqta 100 myńnan astam turaqty jumys ornyn ashýǵa negiz bolady.