«Jumyspen qamtý jol kartasy-2020» aıasynda 118 myń adam jumysqa ornalasty - B.Nurymbetov

ASTANA. QazAqparat - «Jumyspen qamtý jol kartasy-2020» baǵdarlamasynyń aıasynda 118,3 myń adam jumysqa ornalassa, osy adamdar arasynda 97 myń adam turaqty jumys tapqan. Jalpy, jergilikti atqarýshy organdar halyqty turaqty jumys oryndaryna ornalastyrýǵa den qoıýy kerek. Bul týraly búgin Ortalyq kommýnıkatsııalar qyzmetinde «Jalpyǵa ortaq eńbek qoǵamyna qaraı» ıdeıasy taqyrybynda ótken brıfıng barysynda Densaýlyq saqtaý jəne əleýmettik damý vıtse-mınıstri Birjan Nurymbetov məlim etti.

Onyń aıtýynsha, halyq arasynda jalpyǵa ortaq eńbek qoǵamy ıdeıasyn nasıhattaý baǵytynda Eńbek kúnin toılaý mańyzdy sharalardyń biri boldy. «Bul rette, bıyl Eńbek kúnine oraı elimiz boıynsha 160 merekelik shara ótti. Qazaqstannyń óńir-óńirinde, atap aıtsaq, 7 oblys pen 73 aýdan ortalyǵynda eńbek ardagerleri men eńbek dınastıtsııalaryn marapattaýǵa arnalǵan forýmdar uıymdastyryldy. Al jastar arasynda eńbek taqyryby boıynsha semınarlar men konkýrstar ótkizdik. Kəsiporyndar da bul isten qalys qalmaı, óz uıymdarynda Eńbek kúnine oraı «Jalpyǵa ortaq eńbek qoǵamyna qaraı» uranymen flesh-mobtar ótkizip otyrdy», - dedi vıtse-mınıstr. Al halyqty jumyspen qamtý baǵyty boıynsha qandaı jumystar atqarylǵanyn aıta kele, vıtse-mınıstr əkimdikter men kəsiporyndardyń yntymaqtastyǵy týraly aıtty. «Jyl basynan beri óńir əkimdikter, jumys berýshi men kəsipodaqtar arasynda ózara yntymaqtastyq týraly 72 myńnan asa memorandýmǵa qol qoıyldy. Aımaqtyq jumyspen qamtý josparlaryn júzege asyrý aıasynda 311,6 myń adam jumysqa ornalasty. «Jumyspen qamtý jol kartasy-2020» baǵdarlamasynyń aıasynda 118,3 myń adam jumysqa ornalassa, osy adamdar arasynda 97 myń adam turaqty jumys tapqan», - dep habarlady ol.