Jumyspen qamtý jobasy: Shetelde júrgen túrkistandyqtarǵa jalaqy tólengen

TÚRKІSTAN. QazAqparat - Túrkistan oblysynda azamattardy jumyspen qamtýǵa baǵyttalǵan jobany júzege asyrý barysynda kóptegen zańbuzýshylyqtarǵa jol berilgen, dep habarlaıdy QazAqparat tilshisi.

Oblystyq prokýratýra qyzmetkerleri júrgizgen tekserý kezinde osy jobaǵa bólingen qarajattyń talan-tarajǵa túskeni anyqtalǵan. Máselen, áleýmettik jumys oryndaryna jiberilgen 50-ge jýyq azamat shetelde nemese basqa qalalarda júrgen. Alaıda jaýaptylar olardyń jumys istegeni týraly jalǵan qujat toltyryp, jalaqy tólep kelgen. Mundaı zańbuzýshylyqtar Báıdibek, Ordabasy, Saryaǵash jáne Jetisaı aýdandarynda tirkelgen. Birqatar aýdanda jastar praktıkasyna jáne qoǵamdyq jumysqa tartylǵan turǵyndarǵa belgisiz sebeptermen úsh aılap jalaqy tólenbegen. Al keıbir azamattarǵa eńbekaqy ótken jylǵy aılyq eseptik kórsetkishpen tólenip kelgen. Memleketten grant alǵan 52 kásipker jańa jumys oryndaryn ashpaǵan bolsa, taǵy 7 isker azamat múlde kásibin júrgizbegen.

«Tekserý kezinde anyqtalǵan zańbuzýshylyqtar boıynsha qujattar ýákiletti organǵa joldandy. Sebebi, memleketke keltirilgen shyǵyndy anyqtaý kerek. Osydan keıin kináli tulǵalardyń jaýapkershiligi anyqtalatyn bolady», - dedi oblystyq prokýratýranyń basqarma prokýrory Ermahan Ábjanov QazAqparat tilshisine.