Jumyspen qamtý ortalyǵynyń qyzmetin onlaın alýǵa bolady

NUR-SULTAN. QazAqparat - Eńbek jáne halyqty áleýmettik qorǵaý mınıstrligi 17 qarashadan bastap respýblıkalyq mańyzy bar qalalar men oblys ortalyqtarynyń turǵyndary úshin testi rejımde halyqty jumyspen qamtý qashyqtyqtan qyzmet kórsetý fýnktsıonalyn iske qosty, dep habarlaıdy QazAqparat Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

Qazaqstandyqtar Elektrondy eńbek bırjasyndaǵy «jeke kabınetinde» jumys izdep júrgen adam nemese jumyssyz retinde esepke tura alady, memleket sýbsıdııalaıtyn bos jumys oryndaryn óz betinshe tańdaı alady jáne t. b.

Joǵaryda kórsetilgen qyzmetterdi onlaın rejımde alý úshin elektrondyq tsıfrlyq qoltańbany paıdalana otyryp, EEB-da tirkelý qajet.

«Elektrondyq eńbek bırjasyndaǵy pılottyq joba jumyssyzdardy tirkeý rásimderin jeńildetý jáne jumyspen qamtýdy qoldaý boıynsha memlekettik qyzmetterdi, onyń ishinde jumysynan aıyrylý boıynsha áleýmettik tólemderdi alýdy jeńildetý úshin iske qosyldy. Endi barlyǵyn tek ınternet, kompıýter jáne elektrondyq tsıfrlyq qoltańbanyń kómegimen jasaýǵa bolady», – dep habarlady «Eńbek resýrstaryn damytý ortalyǵy» AQ prezıdenti Dáýlet Arǵyndyqov.

Internet nemese kompıýter bolmaǵan jaǵdaıda qyzmetterdi HJQO-da ózine-ózi qyzmet kórsetý aımaǵyn paıdalana otyryp alýǵa bolady. Bul azamattarǵa halyqty jumyspen qamtý ortalyǵynyń mamanyna qabyldaýǵa kezek kútpeýge jáne COVID-19 pandemııasy jaǵdaıynda tike baılanysty azaıtýǵa múmkindik beredi.

«Qyzmet tolyqtaı avtomattandyrylǵan. Bul degenimiz, eger portal úsh jumys kúni ishinde adamǵa laıyqty jumys taba almasa, onda Elektrondyq eńbek bırjasy jumyssyz retinde avtomatty túrde tirkeıdi. Osylaısha, adam faktory tolyǵymen alyp tastalady», – dedi Dáýlet Arǵyndyqov.

«Jeke kabınette» qazaqstandyqtar ózderiniń tirkelý kezeńderin qadaǵalaı alady. Jumyssyz mártebesin alǵannan keıin azamattar onlaın-rejımde EEB-da jumysynan aıyrylý boıynsha áleýmettik tólemge ótinim bere alady jáne memleket sýbsıdııalaıtyn jumys oryndaryn – jastar praktıkasynda, áleýmettik jumys oryndarynda, qoǵamdyq jumysta bos jumys oryndaryn óz betinshe tańdaı alady.

Jumys izdep júrgen adam, jumyssyz retinde tirkeý, memleket sýbsıdııalaıtyn jumys oryndaryna jiberý, jumysynan aıyrylý boıynsha áleýmettik tólem alý boıynsha qyzmet kórsetý týraly tolyǵyraq EEB portalynan nemese halyqty jumyspen qamtý ortalyǵynan bilýge bolady.

Eske sala ketsek, Úkimet otyrysynda QR Eńbek jáne halyqty áleýmettik qorǵaý mınıstri Birjan Nurymbetov 2022 jyly áleýmettik-eńbek salasyndaǵy qyzmetterdiń 93 paıyzy elektrondy bolady dep málim etti.