Jumysqa ornalasýǵa kelgen jigit traktordy aıdap áketti
17:34, 18 Qyrkúıek 2016
ASTANA. QazAqparat - Mınsk qalasynyń MAI qyzmetkerleri jeke qurylys uıymyna jumysqa ornalasýǵa kelip, traktor urlamaq bolǵan 26 jastaǵy jigitti ustady.
Spırtti ishimdikti paıdalanǵan er adam kárizdik jeli jóndelip jatqan aýlaǵa baryp, ondaǵy jumys jaǵdaıymen tanyspaq bolǵan. Aýlada bos turǵan traktordy kórgen ol onymen Táýelsizdik dańǵylyna shyqpaq bolady. Sóıtip, aýlada júrip bara jatqanda qoqys konteınerin soǵady. Konteıner sol jerde turǵan avtomobılge soǵylyp, oǵan zaqym keltirdi, dep habarlaıdy citydog.by.
Jigitti MAI qyzmetkerleri ustaǵanda, onyń kólikti basqarý quqyǵy bolmaǵany anyqtaldy.
Tergeý komıteti zań buzǵan jigitke qatysty qylmystyq is qozǵady.