Jumysqa alǵany úshin para surap kelgen «QTJ-Júk tasymaly» Shymkent fılıaly basshylyǵy sottaldy

ShYMKENT. QazAqparat - Para aldy dep kúdikke ilingen «QTJ-Júk tasymaly» JShS Shymkent fılıalynyń basshylyǵy men qyzmetkerlerine sot úkimi shyqty. Bul týraly Sybaılas jemqorlyqqa qarsy is-qımyl agenttigi Shymkent qalasy boıynsha departamentiniń basshysy Dáýren Erǵarın Facebook paraqshasynda málim etti, dep habarlaıdy QazAqparat tilshisi.

Shymkent qalasy ál-Farabı aýdandyq sotynyń úkimimen «QTJ-Júk tasymaly» JShS Shymkent qalasy boıynsha fılıalynyń basshysy A.Arysbaev pen fılıaldyń eńbek qatynastary jónindegi ınspektory, sondaı-aq QTJ ulttyq kompanııasy Shymkent magıstraldyq jeli bólimshesiniń jetekshi mamany B.Arysbaeva paraqorlyq úshin sottaldy.

Atalǵan adamdar týystary men tanystaryn jumysqa ornalastyrǵany úshin, sondaı-aq qyzmet boıynsha jalpy qamqorlyǵy úshin júıeli túrde 20 myńnan 200 myń teńgege deıingi mólsherde para alyp kelgen.

«Sottalǵandarǵa 200 myńnan 13 mln teńgege deıin (jalpy somasy 18 mln teńgeden astam) aıyppul túrinde jaza taǵaıyndalyp, ómir boıyna memlekettik qyzmette eńbek etý quqyǵynan aıyryldy. Úkim zańdy kúshine engen joq», - dep jazdy Dáýren Erǵarın.