Jumys pen tabys týraly suraq ne úshin qoıylady - halyq sanaǵy

NUR-SULTAN. QazAqparat – Jalpyulttyq sanaq suraǵyndaǵy jumys pen tabys jónindegi saýaldar eldiń ál-aýqaty týraly naqty derekterdi jınaý úshin mańyzdy. Ulttyq statıstıka bıýrosynyń basshysy Nurbolat Aıdapkelov ortalyq kommýnıkatsııalar qyzmetinde ótken brıfıngide osyndaı pikir bildirdi, dep habarlaıdy QazAqparat tilshisi.

«Jumyspen qamtý jáne tabysy týraly derekterdi jınaý memleketke halyqtyń áleýmettik-ekonomıkalyq jaǵdaıyn obektıvti jáne jan-jaqty baǵalaýdy qalyptastyrýǵa múmkindik beredi. Halyq sanaǵy aıasynda halyqty jumyspen qamtý týraly málimetterdi jınaqtaý adamdar men úı sharýashylyqtarynyń áleýmettik-ekonomıkalyq jaǵdaıyn baǵalaý, sondaı-aq jumys oryndaryn ashýǵa, jumysqa ornalasýǵa, jumyssyzdyqqa baılanysty kóptegen ekonomıkalyq jáne áleýmettik máseleler boıynsha saıasat pen baǵdarlamalardy josparlaý úshin óte mańyzdy», - dedi ol.

Bıýro basshysy aralyq sanaq kezeńinde mundaı derekterdiń halyqty jumyspen qamtý boıynsha úı sharýashylyqtaryn iriktep tekserý qorytyndylary boıynsha alynatynyn túsindirdi.

«Halyq sanaǵy aıasynda halyqtyń ómir súrý jáne tabys kózderi týraly málimetter jınaý jumys kúshi men jumyspen qamtý mártebesiniń kórsetkishterin tolyqtyratyn mańyzdy tujyrymdama bolyp tabylady. Bul otbasynyń ál-aýqatynyń, kedeılik deńgeıiniń sıpattamasy», - dedi Nurbolat Aıdapkelov.

Onyń aıtýynsha, sanaq qorytyndysy boıynsha halyqtyń ómir súrý kózderiniń túrleri, jynysy, jasy, óńirleri týraly derekter jınaqtalady. Sondaı-aq, tabys mólsheri týraly derekter, COVID-19 pandemııasynyń tabys deńgeıine qalaı áser etkeni týraly aqparat túziledi.