«Jumys oryndaryn saqtaýǵa kelisti» - baspasózge sholý
***
«Egemen Qazaqstan» gazetiniń jazýynsha, Tarazda qar erip, jer byljyrap jatyr. Al, oblys ortalyǵynan 50-60 shaqyrym qashyqtyqtaǵy Jýaly aýdanynda aq tútek boran kóz ashtyrar emes. Qatar jatqan Jýaly men Túlkibas aýdandaryndaǵy asýlarda qystyń kúnderi qıyn jaǵdaı qalyptasyp, kólik qatynasy jıi-jıi toqtap qalatyny jyl saıyn qaıtalanady. Bıyl da sol jaǵdaı. Sońǵy eki aptada Taraz ben Shymkenttiń arasynda qatynaǵan kólikterdiń júrgeninen turǵany kóp.
Tehnıkanyń damyǵan zamanynda Tabıǵat - Anaǵa qarsy turý tipten múmkin bolmaı tur. 18 jeltoqsannan beri Jambyl oblysynda qar qursaýynda qalyp qoıǵan 337 adam qutqaryldy. Onyń 30-y jas balalar eken. Jalpy alǵanda, sońǵy on kúnde tótenshe jaǵdaı qyzmetine kómek suraǵan 1470 qońyraý túsipti.
- Boran kezinde qar kúreý tipten múmkin emes. Boran joldy lezde-aq jaýyp, bitep tastaıdy. Áıtpese tehnıkanyń bári saqadaı-saı tur. Dál qazir Jýaly aýdanynyń alty aýylyna qatynaý múldem qıynǵa aınaldy. Áıtse de áskerı tehnıkalardyń kómegimen bul aýyldarǵa 3 tonna azyq-túlik jóneltildi. Jol boıynda 17 jylytý pýnktteri jumys isteýde. Aýa raıyn boljaýshy stansalardyń málimetterine jáne tótenshe jaǵdaılar jónindegi qyzmettiń turǵyndardyń uıaly telefondaryna jibergen SMS habarlaryna saparǵa shyqqan jolaýshylar muqııat qarap, saq bolsa durys bolar edi, - deıdi Jambyl oblystyq tótenshe jaǵdaılar jónindegi departament basshysynyń orynbasary, polkovnık Talǵat Sabırov.
Qazir jolaýshylardy qar «tutqynynda» qaldyrmaý úshin jergilikti ákimdik pen tótenshe jaǵdaı qyzmeti qolynan kelgenniń bárin jasaýda. Bul baǵyttaǵy jumystarǵa 120 adam men 23 tehnıka jumyldyrylǵan. Bul materıal «Jolaýshylardyń júrgeninen turǵany kóp» degen taqaryppen berilgen.
«Báıterek» holdınginiń enshiles kompanııasy «Qazaqstannyń Damý banki» (QDB) jyldy shyǵynsyz, iri ındýstrııalyq jobalardyń óskeleń portfelimen aıaqtap otyr. 2016 jyly QDB-ny nesıelik úderiste túbegeıli ózgerister kútip tur. Eldegi jańa ındýstrııalandyrýdyń bas bankine ózgerý ne úshin qajet? QDB-nyń basqarma tóraǵasy Bolat Jámishev «Egemen Qazaqstanǵa» osy máseleler jóninde áńgimeleıdi.
«Eń basty nátıje - valıýtalyq silkinister men ekonomıkanyń barlyq sektorlaryndaǵy iskerlik belsendiliktiń tómendeýine qaramastan, biz shyǵynsyz qyzmetti qamtamasyz ete aldyq. QDB strategııasyna sáıkes, rentabeldiligi joǵary emes jobalardy qarjylandyrǵandyqtan, biz barynsha tabys tabýdy maqsat etpeımiz, biraq oǵan qosa, shyǵynǵa da jol bermeýge tıis ekenimizdi atap ótkim keledi.
Oń qarjy nátıjesine qol jetkizý úshin zaemshylarmen úlken jumys júrgizildi, atap aıtqanda: valıýta baǵamynyń ózgerisine sezimtal jobalar boıynsha zaemdardy qaıta qurylymdaý júrgizildi; sheteldik valıýtada qarjylandyrylǵan ózge jobalar boıynsha biz neǵurlym arzan qarjylandyrý kózderimen almastyrý joldaryn taptyq. Bul sharalar nesıelik portfeldiń sapasyn saqtap qalýǵa jaǵdaı jasady - jumys istemeıtin zaemdar úlesi jyl qorytyndysy boıynsha 4 paıyzdan aspaıdy.
Jalpy alǵanda, bank qyzmettiń sheshýshi josparly kórsetkishterin oryndady, al keıbir kórsetkishter boıynsha biz oza otyryp, alǵa jyljýdamyz. Atap aıtqanda, nesıelik portfel qańtar-qarasha aılarynyń qorytyndysy boıynsha bútindeı jylǵa josparlanǵan 963 mlrd.teńgeniń ornyna 1,3 trln.teńgeden asyp tústi»,-deıdi B. Jámishev. Suhbat « Maqsat - shyǵynǵa jol bermeý» degen taqyryppen kópshilik nazaryna usynylǵan.
***
«Aıqyn» gazetiniń jazýynsha, álemdi sharpyǵan daǵdarys kezinde jumysshylardyń jumys ornyn saqtap qalý maqsatynda Mańǵystaý oblysynyń ákimdigi men ólkedegi iri óndiris oshaqtary «Qarajanbasmunaı» AQ, «Mańǵystaýmunaıgaz» AQ, «Ózenmunaıgaz» AQ, «Býzachı Opereıtıng LTD» kompanııasynyń fılıaly jáne kásipodaq mekemeleri arasynda úshjaqty memorandýmǵa qol qoıyldy. Basty maqsat - jumys oryndaryn saqtap qalý, turǵyndardy áleýmettik qamtý, óndiris úderisin turaqtandyrý. Qazirgi tańda osy kompanııalardyń qarqyndy jumys jasaýynyń nátıjesinde aǵymdaǵy jyly 15 mln tonnaǵa jýyq qara altyn óndirilgen.
Jıynda sóz alǵan aımaq basshysy Alık Aıdarbaev oblysta óndiristik keshenniń turaqty jumysyn qamtamasyz etý, jumys oryndaryn saqtaý maqsatynda qol qoıylatyn úsh jaqty memorandýmnyń mańyzdylyǵyna toqtaldy.
- Bizdiń basty maqsatymyz - qoldan kelgenshe barlyq múmkindikterdi paıdalanyp, oblysta jumys jasap turǵan mekemelerdiń toqtap qalmaýynyń aldyn alý. Búgingi memorandýmǵa qatysyp otyrǵan tórt munaı kompanııasynda 20 myńǵa jýyq adam eńbek etedi. Sondyqtan jumysshylardyń turaqty jumys ornyn saqtap qalý maqsatynda biz osyndaı qadamǵa baryp otyrmyz. Keıbir kompanııalarda áleýmettik kómektiń mólsheri qysqarýy múmkin, biraq jumys oryndarynyń qysqarýyna jol bermeýimiz kerek, - dep atap ótti A.Aıdarbaev. Bul týraly «Jumys oryndaryn saqtaýǵa kelisti» atty maqaladan tolyq oqı alasyzdar.
Osy basylymda «Alash avtonomııasynyń áskeri» degen maqala jarııalandy. Almatydaǵy «Tıan-Shan» qonaqúıinde alashtanýshy jýrnalıst Bolat Múrsálimniń «Alash avtonomııasynyń áskeri» kitabynyń tusaýkeseri ótti.
2012 jyly «Alashorda» atty sýretti kitap qurastyryp, Alash arystarynyń ǵasyr boıy qulyptalyp jatqan sýretterin taýyp, úlken eńbek tyndyrǵan Bolat sodan keıin de bul taqyrypty tereń qaýzaı túsipti. Biz bilgende, alashtanýshy jas ǵalym Sankt-Peterbor, Máskeý, Omby muraǵattaryn aqtaryp, telejobalarǵa atsalysyp qana qoımaı, dál osy Alash áskeri haqynda kınostsenarıı daıyndap ta júrgen. Demek, Bolattyń bul izdenisi maqsatty, sheshimdi áreketke jumyldyrylǵan, nátıjesi óte erekshe jáne sony eńbek ekenin birden aıtyp ótkimiz keledi.
***
«Kazahstanskaıa pravda» gazetine bergen suhbatynda «Samuryq-Qazyna Kontrakt» JShS bas dırektory Serikbek Elshibekov elektrondy satyp alýlar jaıynda egjeı-tegjeıli baıandap bergen.
«Satyp alýlardyń jańa júıesi «Samuryq-Qazyna» kompanııalaryna 138 mıllıard teńge únemdeýge múmkindik berdi. Osy oraıda eleýli aıyrmashylyqty baıqaýǵa bolady. Sonymen birge jetkizýshilerge túsken paıda 17 mlrd. teńgeni qurady. Búginde Elektrondy satyp alýlardyń aqparattyq júıesinde 38 myńnan astam áleýetti jetkizýshiler tirkelgen, sondaı-aq 202 myńnan astam elektrondy stap alýlar júrgizildi»,-dedi S. Elshibekov.
Atap aıtqanda, satyp alýlardyń aqparattyq júıesi 2013 jyly engizilgen bolatyn.
«Jaqyn arada satyp alýlar úderisiniń ashyqtyǵy deńgeıin arttyra túsetin jańa mehanızm engiziledi. Bul turǵyda kelisimderdiń esebi kartochkasy týraly aıtyp otyrmyz. Bul qural jetkizýshiler men tapsyrys berýshiler úshin kelisim boıynsha mindettemeler oryndalmaǵan jaǵdaıda taraptardyń jaýapkershiligi tepe-teńdiligin bekitedi»,-dedi ol. Bul suhbat «V otkrytom formate» degen taqyryppen berilgen.