Jumys kúshi tapshy óńirlerge myńnan astam otbasy kóship keldi

NUR-SULTAN. QazAqparat – Qazaqstanda jumys kúshi tapshy óńirlerge 1 147 otbasy nemese 3,8 myń adam qonys aýdardy. Bul týraly QR Eńbek jáne halyqty áleýmettik qorǵaý mınıstri Tamara Dúısenova Úkimet otyrysynda aıtty, dep habarlaıdy QazAqparat tilshisi.

Mınıstrdiń aıtýynsha, qonys aýdarǵandardyń ishinde 540 adam – shetelden kelgen qandastar.

«Óńirler bólinisinde qandastar men qonys aýdarýshylardy qabyldaý boıynsha Qostanaı, Shyǵys Qazaqstan oblystarynda joǵary kórsetkishterge qol jetkizildi, Qaraǵandy jáne Ulytaý oblystary bul kórsetkish boıynsha artta qalyp keledi. Qonys aýdarýshylardyń jartysyna jýyǵy nemese 44%-y – 29 jasqa deıingi jastar», – dedi Tamara Dúısenova.

Eńbek jáne halyqty áleýmettik qorǵaý mınıstri «Ashyq Qazaqstan 500+» kóshi-qon saıasatynyń tujyrymdamasy ázirlengenin de atap ótti. Ol elimizdiń ekonomıkalyq damýyndaǵy kadrmen qamtý máselesin qoldaýǵa baǵyttalǵan.

Sonymen birge Tamara Dúısenova mınıstrlik «Qýatty óńirler – el damýynyń draıveri» ulttyq jobasyn tabysty iske asyrý boıynsha jumysty jalǵastyratynyn atap ótti.

Aıta keteıik, elimizde óńirler arasyndaǵy aıyrmashylyqty qysqartý úshin «Qýatty óńirler – el damýynyń draıveri» atty ulttyq joba iske asyrylýda.