Jumys kúshi tapshy óńirlerge adamdardyń qonys aýdarýyn yntalandyrý kerek – Úkimet basshysy

ASTANA. QazAqparat – Azamattardy óz elimizdiń ishinde jumys kúshi tapshy óńirlerge qonys aýdarýyn yntalandyrýǵa basa kóńil bólýimiz qajet. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«2027-shi jylǵa deıingi kóshi-qon saıasatynyń tujyrymdamasy kóshi-qon protsesterin basqarýda qoldanystaǵy tásilderdi jetildirip, jańa tásilderdi damytýǵa baǵyttalǵan. Qujattyń negizgi basymdyqtarynyń biri – elimizge joǵary bilikti mamandardy, sonyń ishinde kásipkerlerdi, ıaǵnı áleýetti ınvestorlardy tartý. Sondaı-aq, bizge jergilikti kadrlardy oqytyp, jumysqa ornalastyratyn sheteldik qatysýy bar kásiporyndar úshin jańa ekonomıkalyq yntalandyrý sharalary da qajet. Biz basqa elderden bıznesmenderdi, suranysy bar mamandardy tarta alamyz. Sonymen birge azamattardy óz elimizdiń ishinde jumys kúshi tapshy óńirlerge qonys aýdarýyn yntalandyrýǵa basa kóńil bólýimiz qajet», - dedi Á. Smaıylov.

Bul rette Úkimet basshysy Pavlodar, Soltústik Qazaqstan jáne Ulytaý oblystarynda óńirlik kvotany oryndaý jumystary baıaý ekenin aıtty.

«Eńbek resýrstaryn tartý boıynsha budan da tıimdi sharalar qabyldap, jumys kúshi artyq óńir ákimdikterimen ózara is-qımyldy jolǵa qoıý kerek. Barlyq jerde tıisti beıimdelý jáne ıntegratsııa ortalyqtaryn qurýdy qamtamasyz etý qajet. Mundaı ortalyqtar – Abaı, Aqmola, Soltústik Qazaqstan, Shyǵys Qazaqstan jáne Qostanaı oblystarynda áli kúnge deıin qurylmaǵan», - dedi Premer-Mınıstr.

Budan buryn habarlanǵandaı, jyl sońyna deıin soltústik óńirlerge taǵy 4 512 adamdy (qonys aýdarýshylar men qandastar) qonystandyrý josparlanyp otyr.