Jumys kúshi tapshy aımaqtarǵa qonys aýdarǵandardy eńbekpen qamtý qıyn - mınıstr

ASTANA. QazAqparat – Qonys aýdarý baǵdarlamasyn qaıta qaraý josparlanýda. Bul týraly Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Jumyspen qamtý aýqymyn keńeıtýdiń taǵy bir sharasy – azamattardy jumys kúshi artyq óńirlerden jumys kúshi tapshy aımaqtarǵa qonystandyrý baǵdarlamasy. Búginge deıin bul baǵyttaǵy josparly kórsetkish 71 paıyzǵa oryndaldy. Degenmen, qysta kún sýyǵan kezde ońtústik óńirlerden keletin kósh toqyraıdy. Sol sebepti, kvotalar tolyq ıgerilmeı qalýy múmkin. Qazir Pavlodar oblysynda 1 myńnan astam kvota ıgerilgen joq. Al, Soltústik Qazaqstan oblysyna 500 adam, Qostanaıǵa 362 adam jospardaǵydan az keldi», - dedi mınıstr.

Tamara Dúısenovanyń atap ótýinshe, qonys aýdarǵan azamattardy jumysqa ornalastyrýda da biraz problema bar.

«Úsh óńirde, atap aıtsaq, Aqmola, Soltústik Qazaqstan jáne Pavlodar oblystarynda jumysqa ornalasý úlesi – 58,5 paıyzdan 67 paıyzǵaǵa deıin ǵana bolyp tur. Jumysqa ornalasqannyń ózinde olardyń 54,4 paıyzy ǵana zeınetaqy aýdarymyn jasap otyr. Qazir qonys aýdarý baǵdarlamasyn qaıta qaraý josparlanýda. Aldaǵy ýaqytta azamattar bos jumys orny bar óńirlerge ǵana kóshetin bolady. Sondyqtan, azamattarymyz kóship baratyn óńir ákimderine osy kóshi-qondy qosymsha yntalandyrýdyń jáne kelgen azamattardy jumysqa ornalastyrýdyń óńirlik jol kartasyn ázirleýdi tapsyrýyńyzdy suraımyn», - dedi mınıstr Úkimet basshysy Álıhan Smaıylovqa.