Jumys isteıtin zeınetkerlerge 42500 teńgeden berile me - mınıstr jaýaby

NUR-SULTAN. QazAqparat - Zeınetkerler men áleýmettik járdemaqy alatyndar 42 500 teńge áleýmettik tólem ala ma? Bul saýalǵa búgin Ortalyq kommýnıkatsııalar qyzmetindegi onlaın-brıfıngte QR Eńbek jáne halyqty áleýmettik qorǵaý mınıstri Birjan Nurymbetov jaýap berdi, dep habarlaıdy QazAqparat tilshisi.

«Sizderge memleket tarapynan, bıýdjettiń esebinen aı saıyn zeınetaqy men memlekettik járdemaqy tólenip turady. Olar tótenshe jaǵdaıǵa baılanysty toqtaǵan joq. Qaıta olardyń mólsheri artyp jatyr, ındeksatsııa jasaldy. Ony mamyr aıynda sáýirde qosylǵanymen birge alasyzdar. Sondyqtan sizderden keshirim suraımyz, bul tólem (42500 teńge - avtor) sizderge berilmeıdi», - dedi mınıstr.

Degenmen, onyń aıtýynsha, zeınetker nemese memlekettik járdemaqy alyp júrgen kópbalaly analar, múgedek jandar tótenshe jaǵdaıǵa deıin resmı túrde jumys istegen bolsa, onda bul eskeriledi.

«Iá, sizder zeınetaqy men járdemaqynyń mólsheri kóp bolmaǵandyqtan qosymsha tabys tabamyz dep jumys istegensizder. Sizderge - bolady. Sizder ótinishterińizdi beresizder. Qosymsha eshteńe tólemeńizder. Tótenshe jaǵdaıǵa deıin tólegen bolsańyzdar, biz ony kóremiz. Jasyńyzǵa qaramaı, járdemaqy alǵanyńyzǵa jáne basqalaryna qaramaı áleýmettik tólem beremiz», - dedi Birjan Nurymbetov.