Jumys isteýge múmkindik berińizder: Jańaózen ákimi narazylyqqa shyqqan turǵyndarǵa úndeý jasady

JAŃAÓZEN. QazAqparat – Jańaózen qalasynyń ákimi Aıbek Qosýaqov narazylyq aktsııasyn uıymdastyrǵan jumyssyzdarǵa «Jumys jasaımyn» jobasy aıasynda jalaqysy 140-280 myń teńge aralyǵynda bolatyn jumys usyndy. Ol bul jaıynda áleýmettik jelidegi paraqshasynda jazdy, dep habarlaıdy QazAqparat tilshisi.

«Qadirli jerlester! Búgin bir top jumyssyz azamat Jańaózen qalasy ákimdiginiń aldyna narazylyq aktsııasyn uıymdastyryp, munaı-gaz salasyna jumysqa ornalaspaıynsha, ashtyq jarııalaıtynyn málimdedi. Buryndary aıtqanymdaı, barlyǵyn bir ýaqytta munaı-gaz salasyna jumysqa ornalastyrý múmkin emes. Memleket usynatyn jumysqa ornalasýdyń barlyq múmkin nusqalaryn paıdalaný qajet. Alaıda, ókinishke qaraı, bizdiń keıbir azamattarymyz muny tyńdaǵysy da, memleket bergen múmkindikti paıdalanǵysy da kelmeıdi»,-dedi Aıbek Qosýaqov.

Sondaı-aq ol qoldanystaǵy algorıtm boıynsha jumysqa ornalasý kezegin kútip otyrǵan adamdarǵa qııanat jasaı almaıtynyn jetkizgen.

«Biz jumysqa ornalasýdyń basqa balamasyn usynamyz. Siz «Jumys jasaımyn» jobasy aıasynda jalaqysy 140-tan 280 myń teńgege deıin bolatyn bos jumys oryndary tizbegindegi jumysqa tura alasyz. Olardyń kópshiligi úshin joǵary bilimniń bolýy mindetti emes. Jáne de bul munaı-gaz sektoryndaǵy kezegińizdi kútýge eshqandaı kedergi keltirmeıdi. Menińshe bul usynys – jumyssyz júrgennen jaqsy, otbasyńyzǵa qoldaý bolary anyq» deıdi ol.

Sonymen birge shahar basshysy halyqty jumyspen qamtamasyz etýdiń ózekti másele ekenin aıtyp, turǵyndardy jaqsy isterdi birlese atqarýǵa shaqyrǵan.

«Jańaózende óz sheshimin talap etetin birqatar másele bar. Árıne, onyń biri - halyqty jumyspen qamtamasyz etý. Biraq kóbinese áriptesterimizben birge bar ýaqytymyzdy qalamyzdyń ózekti máselelerin júıeli sheshýden góri mıtıngiler men ereýilderge jumsaýymyzǵa týra keledi. Qurmetti jerlester! Bizge jumys isteýge múmkindik berseńizder! Bizdiń esigimiz sizderge árdaıym aıqara ashyq. Kóptegen qoǵam belsendileri ártúrli másele boıynsha túrli komıssııalarymyzdyń jumysyna aralasyp, qatysyp keledi. Sizderdiń kómekterińiz árdaıym qajet jáne biz sizdermen birge odan da jaqsy isterdi atqara alamyz. Ortaq kúsh-jigerimizdi halyq múddesine jumsaı otyryp, qalamyzdyń jáne onyń azamattarynyń ómirin jaqsartatynymyzǵa bek senimdimin», - deıdi ákim.

Aıta ketsek, búgin Jańaózen ákimdigi aldyna jınalǵany úshin ustalǵan 17 adamdy polıtsııa bosatqanyn jazǵan edik.