Jumys istep júrgen stýdentter 42 500 teńge alýyna bolady

NUR-SULTAN. QazAqparat - Jumys istep tabys taýyp júrgen stýdentter de 42 500 teńge áleýmettik tólem ala alady. Bul týraly búgin Ortalyq kommýnıkatsııalar qyzmetindegi brıfıngte QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

«Stýdentter áleýmettik tólem ala ma degen de suraq kelip jatyr. Bul rette stýdentter degen bólek sanat joq. Sebebi ol - elimizdiń kámelettik jasqa tolǵan azamaty. Eńbek zańyna sáıkes, 16 jastan bastap jumys isteýge bolady. Shákirtaqy alatyndyǵyna, almaıtyndyǵyna qaramastan jumys isteýine esh kedergi joq. Ondaı shekteý de qoıylmaıdy», - dedi mınıstr.

Onyń atap ótýinshe, stýdentterdiń basym kópshiligi oqý protsesine kedergi kelmeıtin ýaqytta jumys istep júr.

«Meıramhanalarda daıashy, dúkenderde satýshy bolyp jumys isteıtinder bar. Olar resmı jáne beıresmı jumys istep júr. Sondyqtan stýdentterge jalpy barlyq azamattarǵa birdeı tártip qarastyrylady. Eger resmı jumys istese, jumys berýshi beredi. Al óz betinshe aqsha taýyp júrgender bolsa, ótinish berýleri qajet. Biraq, odan bir kún buryn biryńǵaı jıyntyq tólemdi tóleýi kerek. Sol kezde áleýmettik tólem alady. Biz shákirtaqy alatyndyǵyn ne almaıtyndyǵyn tekserip jatpaımyz», - dedi Birjan Nurymbetov.