Jumys istep turǵan 9 bankti taratý týraly aqparat shyndyqqa sáıkes kelmeıdi

ASTANA. QazAqparat - BAQ-ta taratylyp jatqan Qazaqstanda jumys istep turǵan 9 bankti taratý týraly aqparattyń shyndyqqa sáıkes kelmeıdi. Bul týraly Qazaqstan Respýblıkasynyń Qarjy naryǵyn retteý jáne damytý agenttiginiń baspasóz qyzmeti habarlady.

«Áleýmettik jeliler men BAQ-ta taratylyp jatqan Qazaqstanda jumys istep turǵan 9 bankti taratý týraly aqparattyń shyndyqqa sáıkes kelmeıdi.

Qazirgi ýaqytta Qazaqstanda 21 ekinshi deńgeıdegi bank qyzmetin júzege asyrýda.

Budan basqa, atalǵan ekinshi deńgeıdegi 21 bankten basqa, taǵy 9 bank 2007 jyldan beri taratý protsesinde.

Taratý protsesinde turǵan atalǵan 9 banktiń lıtsenzııalary 2007 jyldan 2021 jylǵa deıingi kezeńde keri qaıtaryp alyndy, atap aıtqanda:

1) Valıýt-tranzıt bank (taratý – 2007 jylǵy 1 naýryzdan bastap);

2) Qazınvestbank (2018 jylǵy 24 qańtardan bastap);

3) Delta Bank (2018 jylǵy 25 sáýirden bastap);

4) Qazaq Banki (2018 jylǵy 12 jeltoqsannan bastap);

5) Astana Banki (2019 jylǵy 9 qańtardan bastap);

6) Eksımbank Qazaqstan (2019 jylǵy 16 qańtardan bastap);

7) Tengri Bank (2021 jylǵy 15 aqpannan bastap);

8) AsiaCredit Bank (2021 jylǵy 22 shildeden bastap);

9) CapitalBank Kazakhstan (2021 jylǵy 5 qazannan bastap)», - delingen habarlamada.

Málimetke saı, taratylatyn bankterdiń taratý óndirisiniń barysy týraly aqparat toqsan saıyn atalǵan agenttiktiń resmı saıtynda «Qarjy naryqtary - Bank sektory - Taratý protsesi - Taratý protsesiniń aǵymdaǵy mártebesi týraly aqparat» bóliminde ornalastyrylady (2023 jylǵy 1 shildedegi jaǵdaı boıynsha taratylatyn bankter boıynsha ózekti aqparat saıtta 2023 jylǵy 14 shildede ornalastyryldy).

Osyǵan baılanysty taratý protsesi jumys istep turǵan 21 ekinshi deńgeıdegi bankke qatysty emes, lıtsenzııalary 2007-2021 jyldary qaıtaryp alynǵan basqa 9 bankke qatysty júrgiziledi.

Jumys istep turǵan 21 ekinshi deńgeıdegi bankten lıtsenzııalardy keri qaıtaryp alý josparlanyp otyrǵan joq.

Qazirgi ýaqytta Qazaqstan Respýblıkasynyń bank sektorynda 21 ekinshi deńgeıdegi bank bar, onyń ishinde 12 bank shet eldiń qatysýymen jumys isteýde, onyń 8-i – enshiles bank.

Búgingi kúni bank sektory turaqty, bankter barlyq prýdentsııalyq normatıvterdi oryndaýda.

Bank sektorynyń aktıvteri 46,6 trln teńgeni quraıdy. Ekinshi deńgeıdegi bankterde 13,7 trln teńgeni nemese jıyntyq aktıvterdiń 29,4%-yn quraıtyn ótimdiligi joǵary aktıvterdiń eleýli qory bar. Bos ótimdiliktiń bolýy bankterge óz mindettemelerin tolyq kólemde oryndaýǵa múmkindik beredi.

Bank sektorynyń menshikti kapıtaly 5,7 trln teńgeni qurady. Bankterdiń negizgi kapıtalynyń jetkiliktilik koeffıtsıenti (k1) 18,6%-dy, menshikti kapıtalynyń jetkiliktilik koeffıtsıenti (k2) 21,4%-dy qurady, bul zańnamada belgilengen normatıvterden (min. tıisinshe 5,5% jáne 8%) aıtarlyqtaı asyp ketedi jáne bank sektoryndaǵy yqtımal táýekelderdi óteýdi qamtamasyz etedi.

Kredıt portfeliniń sapasy turaqty bolyp qalyp otyr. Jumys istemeıtin NPL qaryzdardyń úlesi nesıe portfeliniń 3,6%-yn qurady. Jumys istemeıtin kredıtterdi provızııalarmen óteý joǵary deńgeıde qalyp, 77,4%-dy quraıdy.