Jumys berýshilerdiń qazaqstandyq JOO-dyń bilim sapasyna degen senimi artyp keledi

ASTANA. QazAqparat – QR Ǵylym jáne Joǵary bilim mınıstrligi eldegi joǵary oqý oryndarynyń (JOO) 2022 jylǵy reıtıngin jarııalady. Zertteýdi «Atameken» ulttyq kásipkerler palatasy júrgizgen, dep habarlaıdy QazAqparat tilshisi.

QR Ǵylym jáne joǵary bilim mınıstrligi Ǵylym jáne joǵary bilim salasyndaǵy sapany qamtamasyz etý komıtetiniń tóraǵasy Gúlzat Kóbenovanyń aıtýynsha, JOO bilim berý baǵdarlamalary 19 krıterıı boıynsha baǵalandy. Reıtıng ádistemesi ashyq talqylaý nátıjesinde qabyldandy jáne únemi jetildirilip otyrady.

«Reıtıng úsh negizgi blokqa biriktirilgen: túlekterdiń mansaptyq perspektıvalary, bilim berý baǵdarlamalarynyń sapasy jáne bilim alýshylardyń jetistikteri. 2022 jyldyń qorytyndysy boıynsha, jumys berýshiler tarapynan qanaǵattanýdyń ósýi baıqalady, ol 67% qurady. Úsh jyldaǵy dınamıka ósimi 15%, bul jaqsy nátıje», - dedi G. Kóbenova Ortalyq kommýnıkatsııalar qyzmetinde ótken baspasóz máslıhatynda.

Bilim berý baǵdarlamalarynyń 82% jumys berýshilermen kelisilgen jáne praktıkalyq tájirıbesi bar mamandar oqý protsesine tartylǵan.

«Ol úshin mınıstrlik qajetti jaǵdaılar jasap, tıisti normatıvtik qujattarǵa ózgerister engizdi. Búgingi tańda jekelegen bilim berý baǵdarlamalaryna tartylǵan praktık-mamandardyń úlesi 71%-ǵa jetti. Bilim berý baǵdarlamalarynyń 91% akkredıtteý agenttikterinde akkredıtteýden ótti, bul da olardyń sapasyn jaqsarǵanyn rastaıdy», - dedi spıker.