Jumys berýshiler aılyq kólemin jumysshymen kelisip belgileýi kerek – kásipodaq
Bul jaıynda QR Kásipodaqtar federatsııasynyń tóraǵasy Satybaldy Dáýletalın BAQ ókilderine «Jańa qoǵamdyq kelisim: Ádiletti eńbek qatynastary» atty áleýmettik áriptester forýmynyń aldynda málim etti.
«Biz Úkimetke de birqatar usynystar berdik. Mysaly, jumys berýshi men jumysshy arasyndaǵy kiristi bólýdiń ádiletsiz júıesin túzetý qajet. Bul qyzmetkerlerdi is júzinde qarjylyq táýeldilikke ákeledi. Onyń saldarynan quqyqtyq enjarlyq paıda bolady. Sondyqtan jalaqy júıesin túbegeıli ózgertý kerek. Ókinishke qaraı, qazir eńbekaqy tóleý júıesin jumys berýshi belgileıdi. Biz Eńbek kodeksine eńbekaqy tóleý júıesi eń áýeli jumysshylar ókiliniń maquldaýy arqyly belgilenýi tıis degen baǵytta ózgerister engizýdi talap etip, usynyp otyrmyz»,-dedi Satybaldy Dáýletalın.
Onyń paıymynsha, jumysshylar óndiristi basqarý isine de erkin qatysýy kerek.
«Bul álemdik tájirıbe jáne biz de soǵan umtylýymyz kerek. Prezıdent eń tómengi jalaqy mólsherin anyqtaý ádistemesin ázirleý týraly bizdiń bastamamyzdy qoldady. Óıtkeni onyń qalaı qalyptasatyny osy ýaqytqa deıin belgisiz bolyp keldi. Endi sonyń ádistemesi anyqtalýy kerek jáne onyń qalaı qalyptasatynyn kez kelgen adam bilýi kerek», - dedi Kásipodaqtar federatsııasynyń tóraǵasy.