Jumysshy mamandyqtaryn dáripteý úshin Astanada qandaı sharalar qabyldanyp jatyr

<p>ASTANA. KAZINFORM - 2025 jyl Memleket basshysynyń Jarlyǵymen Qazaqstanda jumysshy mamandyqtary jyly bolyp jarııalandy.</p>

Osy mamandyqtardy dáripteý maqsatynda elordada Halyqty jumysqa ornalastyrýǵa járdemdesý boıynsha birqatar is-shara josparlanýda. Bul týraly kommýnıkatsııalar qyzmetinde ótken brıfıngte qalalyq jumyspen qamtý jáne áleýmettik qorǵaý basqarmasynyń basshysy Ilıa Skýb aıtty, dep habarlaıdy Astana ákimdiginiń resmı saıty.

Jumysshy kásipteriniń bedelin arttyrý jáne tehnıkalyq ári kásiptik bilim berý júıesin reformalaýdy júzege asyrý, qoǵamda eńbekqorlyq pen kásibılik ıdeıasyn ilgeriletý maqsatynda 2025 jyl Qazaqstanda Jumysshy mamandvqtary jyly bolyp jarııalandy.

— Jumysshy mamandyqtary jyly sheńberinde is-sharalar, sonyń ishinde halyqty jumyspen qamtý salasy boıynsha is-sharalar josparlanǵan. Jumyssyz azamattardy elordanyń eńbek naryǵynda suranysqa ıe mamandyqtar boıynsha, onyń ishinde 8 myńnan astam adamdy qamtıtyn JOLTAP jobasy boıynsha kásiptik oqytýdy uıymdastyrý, onyń 5 myńnan astamy elektr gazben dánekerleýshi, avtomobıl júrgizýshisi, aǵash ustasy jáne jıhaz óndirisiniń sheberi, aspaz, shashtaraz, tiginshi, florıst, sánger-konstrýktor sııaqty jumys mamandyqtary boıynsha, aıaq kıimdi jóndeý jáne kiltter jasaý, korpýstyq jıhaz jasaý negizderi, maı men avtoshınalardy aýystyrý boıynsha AVTO maman jáne basqalar, — dedi Ilıa Skýb.

Sonymen qatar elordada Bos oryndar jármeńkesi, onyń ishinde túlekterdi jumysqa ornalastyrý boıynsha turaqty negizde ótkiziletin bolady.

Qalanyń 3000-nan astam oqýshysyn qamtı otyryp, jumysshy mamandyqtaryn tańdaý boıynsha 9-11 synyp túlekterimen kásiptik baǵdar berý jumystaryn júrgizý jalǵasady.

Sondaı-aq elordanyń óndiristik jáne kommertsııalyq nysandarynda «Meniń mamandyǵym» ashyq esik kúnderi jáne birqatar is-shara uıymdastyrylady.

— Maqsat — joǵary synyp oqýshylaryna elordanyń óndiristik jáne kommertsııalyq nysandarynda suranysqa ıe jumys protsesterimen jáne olardyń erekshelikterimen tanysýdyń biregeı múmkindigin berý. Bul is-sharalar jastardyń ártúrli mansap joldary týraly túsinikterin qalyptastyrýǵa, tehnıkalyq jáne kommertsııalyq mamandyqtarǵa degen qyzyǵýshylyǵyn arttyrýǵa, sondaı-aq bolashaq mamandyqty tańdaýda praktıkalyq kómek kórsetýge baǵyttalǵan, — dedi qalalyq basqarma basshysy.

Aıta ketsek, Qazaqstanda qyrkúıektiń sońǵy jeksenbisinde ataly ótetin Eńbek kúnine oraı Astanada eńbek forýmy, eńbek ardagerleri men óndiristiń ozattaryn mamandyqtar/salalar boıynsha tanymal etý úshin qurmetteý ótkiziledi. Sondaı-aq «Úzdik eńbek dınastııasy», «Óndiristiń úzdik jas qyzmetkeri» jáne «Jumys isteıtin jastardyń úzdik tálimgeri» nomınatsııalary boıynsha «Eńbek joly» konkýrsy uıymdastyrylady.

«Úzdik áleýmettik jaýapty kásiporyn», «Eńbekti qorǵaý salasyndaǵy úzdik kásiporyn», «Úzdik ujymdyq shart» nomınatsııalary boıynsha «Paryz» bıznestiń áleýmettik jaýapkershiligi jónindegi konkýrstyń qorytyndysy shyǵarylady.

Aıta keteıik, SQO-da 2 myńǵa jýyq jas memlekettik tapsyryspen jumysshy mamandyqtardy ıgerip jatyr.