Jumysshynyń mártebesi kóterilmese, óndiristi de, aýyl sharýashylyǵyn da damytý qıyn - depýtat

<p>ASTANA. KAZINFORM - Aýyl sharýashylyǵy salasynda jeńildetilgen nesıe berý máselesin qarastyrý kerek. Al jumysshy mamandyqtardyń mártebesin kóterý úshin, qajet bolsa tıisti zańdarǵa ózgeris engizýge bolady. Bul týraly Májilis depýtaty Edil Jańbyrshın málim etti.&nbsp;</p>

«Bankter aýyl sharýashylyǵy baǵytyna qatysty jeńildetilgen nesıe berý máselesin qarastyrýy kerek. Máselen, Parlament depýtattary Agrobank qurý kerek ekenin birazdan beri aıtyp júr. Ózim de osy ıdeıany qoldaımyn», - dedi E. Jańbyrshın.

Sonymen qatar depýtat Joldaý aıasynda jumysshylardyń mártebesin kóterý taqyrybyna toqtaldy.

«Jumysshy mamandyqtardyń mártebesin kóterýdi óte durys dep esepteımin. Qajet bolsa, tıisti zańdarǵa ózgeris engizýge bolady. Bul rette, «Memlekettik nagradalar týraly» Zańǵa ózgeris engizilýi múmkin. Jalpy, qarapaıym jumysshynyń mártebesi kóterilmese, onda óndiristi de, aýyl sharýashylyǵyn da damytý qıynǵa túsedi. Sondyqtan Prezıdenttiń kótergen usynystary mańyzdy dep oılaımyn», - dedi depýtat.

Aıta keteıik, búgingi Joldaýda Memleket basshysy Qasym-Jomart Toqaev 2025 jyldy Jumysshy mamandyqtary jyly dep jarııalady.

«Osy ýaqyt ishinde tehnıkalyq jáne kásibı bilim berý júıesin reformalaý qajet. Sondaı-aq biz jumysshy mamandyqtardy dáripteý arqyly qoǵamda eńbekqor jáne naǵyz maman bolý ıdeıasyn nasıhattaımyz», - dedi Qasym-Jomart Toqaev.

Sonymen qatar Prezıdent «Bankter týraly» jańa zań qajet ekenin aıtty.