Jumysshy mamandyqtar jyly: 10 kásibı mereke atap ótiledi

<p>ASTANA. KAZINFORM &mdash; Ónerkásip jáne qurylys mınıstri Qanat Sharlapaev Úkimet otyrysynda bıyl elimizde 10 kásibı mereke atap ótiletinin aıtty.</p>

— Jumysshy mamandyqtar jylyna oraı mınıstrlik jetekshilik etetin salalardaǵy jumysshy mamandyqtar ókilderin madaqtaýǵa arnalǵan 10 kásibı merekeni atap ótý kózdelgen, — dedi ol.

Sondaı-aq, vedomstvo josparynda oqýshylar men stýdentterge «ashyq esik kúnderin» uıymdastyryp, kolledjderde jumys jármeńkelerin ótkizý kózdelip otyr.

— Buǵan qosa, áleýmettik áriptestik jáne eńbek qatynastaryn retteý boıynsha jumystar jalǵasady, — dedi mınıstr.

Eske salsaq, Prezıdent Jarlyǵymen 2025 jyl Jumysshy mamandyqtarynyń jyly dep jarııalanǵan edi.

Osyǵan deıin Qanat Sharlapaev qurylys pen metallýrgııa salasynda paıda bolǵan jańa mamandyqtardy ataǵanyn jazdyq.