Jumys berýshiler qolastyndaǵylardyń talabyna qulaq túrmeıdi - Kásipodaqtar federatsııasynyń tóraǵasy

<p>ASTANA. KAZINFORM &ndash; Halyqaralyq eńbek uıymynyń bas dırektory Jılber Ýngbo Qazaqstanǵa alǵash ret resmı saparmen keldi. Osy rette, QR Kásipodaqtar federatsııasy ǵımaratynda arnaıy jıyn uıymdastyrylyp, eńbek salasyndaǵy ózekti máseleler talqylandy. Atap aıtsaq, eńbek ınspektsııasy júıesin reformalaý, jumys oryndaryndaǵy qaýipsizdikti qamtamasyz etý, jastardyń quqyqtaryn qorǵaý boıynsha usynystar aıtyldy.</p>

QR Kásipodaqtar federatsııasynyń tóraǵasy Satybaldy Dáýletalınniń málimetinshe, 2023 jyly elimizde 84 eńbek daý-damaıy tirkelgen. Onyń 31-i – kásipodaq uıymdaryna qatysty. 

«Aıta ketý kerek, 48 eńbek daýyn sheshýge Kásipodaqtar federatsııasy men enshiles uıymdardyń ókilderi qatysty. Kásipodaq uıymy joq 17 kásiporynnyń máselesi de nazardan tys qalmady. Eńbek janjaldarynyń týyndaýynyń negizgi faktorlary retinde eńbekaqy boıynsha problemalar, jumys berýshilerdiń jumysshylardyń talaptaryn elemeý faktileri nemese jumys berýshilerdiń olardy sheshýge múddeli bolmaýy, sondaı-aq uıymdarda kásipodaqtardyń bolmaýyn atap ótýge bolady. Eńbek janjaldarynyń qaýpin jedel anyqtaý úshin Kásipodaqtar federatsııasy apta saıyn kásipodaq monıtorıngin júrgizedi», - dedi Satybaldy Dáýletalın.

Halyqaralyq eńbek uıymynyń bas dırektory Jılber Ýngbo óz sózinde sońǵy jyldary Qazaqstannyń kómirli shahtalarynda apatty jaǵdaılar jıi oryn alǵanyn, bul rette, jumys oryndaryndaǵy qaýipsizdikti qamtamasyz etýge basa mán berý kerek ekenin atap ótti.

Pavlodar qalasy Muzafar Álimbaev atyndaǵy JOBBM dırektordyń tárbıe jumys jónindegi orynbasary, Kásipodaq jastar keńesiniń múshesi Orazbek Bahathan Kásipodaqtar federatsııasy men onyń múshelik uıymdary kásipodaqtardyń jas músheleriniń eńbek quqyqtary men áleýmettik-ekonomıkalyq múddelerin qorǵap qana qoımaı, sonymen qatar jastardy kásipodaqtardyń barlyq satylaryna tartýǵa baǵyttalǵan maqsatty jumys júrgizip jatqanyn atap ótti.

«Bul jumystardyń nátıjesi - respýblıkalyq jáne óńirlik deńgeılerde qurylǵan jastar keńesteri, jastardyń ujymdyq sharalarǵa jáne dástúrli naýqandarǵa turaqty qatysýy, ustazdar lagerlerin ótkizý, jas kásipodaq kóshbasshylaryn kadr rezervi boıynsha ilgeriletý. Jastar – qoǵamnyń qozǵaýshy kúshi, sondyqtan jastarmen jumys - kadr saıasatynyń jáne kásipodaq qozǵalysyn uıymdastyrýshylyq nyǵaıtýdyń mańyzdy baǵyttarynyń biri bolyp tabylady. Jyl saıyn jas kásipodaq kóshbasshylaryn daıyndaýǵa qoıylatyn talaptar aıtarlyqtaı artyp keledi, bul XXI ǵasyrda kásipodaqtardyń damýy men ózgerýine jańa serpin beretini sózsiz», - dedi ol.

Aıta keteıik, HEU – eńbek qatynastaryn retteýmen aınalysatyn Birikken Ulttar Uıymynyń mamandandyrylǵan mekemesi. Onyń quramyna Qazaqstandy qosqanda 187 memleket kiredi. Uıymnyń negizgi maqsaty – áleýmettik ádilettilikti qamtamasyz etý.

Uıym qaqtyǵystardy sheshý jáne eńbek jaǵdaılaryn jaqsartý úshin úkimetter, jumys berýshiler jáne jumysshylar arasyndaǵy dıalogty ilgeriletetin trıpartızm qaǵıdaty boıynsha jumys isteıdi.