Jumanǵarın ýaqyt beldeýiniń shyǵys óńirge áseri týraly: jumys kestesin ózgertýge bolady

<p>ASTANA. KAZINFORM &ndash; Premer-mınıstrdiń orynbasary Serik Jumanǵarın biryńǵaı ýaqyt beldeýiniń adamdarǵa áserin zertteý máselesine qatysty pikir aıtty.</p>

— Álem tájirıbesine sáıkes Úkimet durys (biryńǵaı ýaqyt beldeýi boıynsha) sheshim qabyldady dep esepteımiz. Oǵan qatysty biraz dálel bar, ıaǵnı eń tanymal halyqaralyq ınstıtýttar men ǵalymdar qoldap otyr. 2022 jyly olar Barselona deklaratsııasyna qol qoıǵan. 80-nen astam uıym men birqatar ǵalym bekitken. Sol sebepti biz olardan artyq emespiz, basqa pikir qosa almaımyn. Úkimet qazir osyǵan deıingi sheshimin qoldaıdy, — dedi S. Jumanǵarın Parlament Májilisinde tilshiler suraǵyna jaýap bere otyryp.

Sonymen qatar ol elimizdiń shyǵys óńirindegi turǵyndardyń burynǵy ýaqyt beldeýin qaıtarý talabyna pikir bildirdi.

— Júrgizilgen taldaýǵa qarasaq, narazylyqtyń basqa jaǵy da bar. ıAǵnı qarańǵy túskende eldi mekenniń kóshelerinde jaryqtyń bolmaýy, ınfraqurylymnyń bolmaýy, jaıaý júrginshiler jolaǵynyń qardan tazalanbaýy sııaqty problemalar sheshilmegen. Bul turǵyda turǵyndarǵa jaǵdaı jasaý kerek. Sonymen qatar, ol jaqta jumys ýaqytyn erte bastap, erterek aıaqtaý bóliginde ózgeris jasaýǵa bolady. Onyń bárin sheshemiz, — dedi Úkimet basshysynyń orynbasary.

Serik Jumanǵarın aldaǵy aptada halyqaralyq sarapshylar men otandyq ǵalymdar halyqqa biryńǵaı ýaqyt beldeýine qatysty túsinik beretinin aıtty.

— Aldaǵy zertteýge (Qazaqstanda biryńǵaı ýaqyt beldeýiniń adamdarǵa áseri týraly zertteý) toqtalsam, ol boıynsha qandaı sheshim bolatynyn naqty aıta almaımyn. Zertteý barysynda halyqaralyq tájirıbeni Qazaqstannyń tájirıbesimen salystyryp shyǵamyz, — dedi Premer-mınıstrdiń orynbasary.

Eske sala keteıik, bıyl 1 naýryzdan bastap Qazaqstanda ýaqyt bir saǵat artqa jyljydy. 

Osydan keıin ózgeriske qarsy shyqqan qazaqstandyqtar buryn qoldanysta bolǵan ýaqyt beldeýin qaıtarý jónindegi petıtsııa jarııalady.

Al qarasha aıynda Qazaqstanda biryńǵaı ýaqyt beldeýiniń adamdarǵa áseri zertteletini habarlandy.

Jaqynda Parlament depýtattary múddeli memlekettik organdarǵa biryńǵaı ýaqyt beldeýi máselesine qatysty ǵylymı-zertteý jumysyn aldaǵy jyldyń naýryz aıyna deıin aıaqtaýdy tapsyrdy.