«Juldyzdy ańyz-ertegiler» jobasy óner juldyzdarynyń oqýyndaǵy jańa ertegilermen tolyqty

ASTANA. QazAqparat - «Nur Otan» partııasynyń «Balalyq shaq» baǵdarlamasy aıasynda jaryq kórgen, «Altyn Kyran» halyqaralyq qaıyrymdylyq qory qoldaý kórsetken joba - www.ertegiler.kz saıtyna elimizdiń belgili óner qaıratkerleriniń oqýyndaǵy 29 ertegi engizildi. 2014 jyldyń jeltoqsanynda jarııalanǵan ertegilerdiń aýdıonusqasyna Janar Aıjanova, Almas Kishkenbaev, Nurlan Qoıanbaev sekildi t.b. óner juldyzdarynyń oqýyndaǵy ertegiler qosyldy, dep habarlanǵan partııanyń resmı saıtynda.

Sonymen birge Android jáne iOS platformalarynda qoljetimdi mobıldi qosymshalar da jasaldy. Endi uıaly telefonynda ınterneti bar kez-kelgen qoldanýshy óziniń qurylǵysyna juldyzdy oryndaýshylardyń aıtqan ertegileri men ańyzdaryn júkteı alady.

«Saıttyń alǵashqy nusqasy qazaqstandyqtardyń qyzyǵýshylyǵyn týdyrdy. Mobıldi qosymshasynyń bolýy týraly kóptegen ótinishter kelip tústi. Sondyqtan kele jatqan kóktem merekeleri qarsańynda otandastarymyzǵa osyndaı syılyq jasap otyrǵanymyzǵa qýanyshtymyz», - deıdi joba avtorlary - «Aray Media Group» stýdııasy ókilderi. Saıtta ertegilerden basqa taǵy bir «balalarǵa bazarlyq» bar. Qaraqat Ábildına, Gúlmıra Sarına, Janar Duǵalova sekildi jobaǵa qatysqan ánshiler ózderiniń ásem daýysymen besik jyrlaryn da oryndap berdi. «Negizi, besik jyrlaryn, ulttyq ertegilerdi tyńdap ósken balanyń táni de, jany da sulý bolyp ósetin belgili. Al qazaq ertegileriniń ǵasyrlar boıy jınaǵan danalyǵy, ańyz keıipkerleriniń boıyndaǵy eń jaqsy qasıetter, olardyń erligi kishkentaı tyńdarmandardyń boıynda shynaıy patrıottyq sezimdi oıatyp, óz tarıhyna, óz tiline degen súıispenshilikke tárbıeleıtini aıan», - deıdi «Aray Media Group» stýdııasynyń dırektory Marat Ahmetjanov. Esterińizge sala keteıik, www.ertegiler.kz saıty - elimizdiń óner sheberleriniń qatysýymen daıyndalǵan qazaqtyń halyq ertegileri men ańyzdarynyń biregeı aýdıonusqasynan turady.