«Juldyzaı-2023» – Qazaqstanda ınklıýzıvti oıyndar boıynsha jalǵyz joba bar

<p>Elordada múmkindigi shekteýli balalar arasynda &laquo;Juldyzaı &ndash; 2023&raquo; ulttyq ınklıýzıvti oıyndary aıaqtaldy, dep habarlaıdy <a href="https://kaz.inform.kz/" target="_blank" rel="noopener">QazAqparat </a>tilshisi.</p>

Jarystar shaǵyn fýtbol, golbol, ústel tennısi, jeńil atletıka, toǵyzqumalaq, asyq atý, bes tas sııaqty sport túrlerinen ótken.

«Juldyzaı» qory 2016 jyldan beri damý erekshelikteri bar balalar arasynda jarystar ótkizip keledi. Bul oıyndarǵa 10-16 jasqa deıingi balalar qatysady. Bıyl da elordaǵa múmkindik taýyp, 16 óńirden 500-den astam bala kelgenine qýanyshtymyz. Olardyń elordany kórýine, áleýmettenýine jáne eń bastysy – ózderiniń sporttyq sheberlikterin kórsetýine óńirlik sport, bilim basqarmalary, ákimdikter kómektesti. Kóptegen balalar elordany alǵash ret kórdi, ekskýrsııalar ótkizdik, barlyq jarystardy Jekpe-jek saraıy, Qazaqstan sport kesheni sekildi elordanyń eń úzdik sport keshenderinde ótkizdik», - dedi «Juldyzaı» qory dırektorynyń orynbasary Almagúl Sálimbaeva elordada ótken baspasóz máslıhatynda.

Qor ókili qoǵamǵa, memlekettik organdarǵa múmkindigi shekteýli balalardyń sportpen shuǵyldanýy óte mańyzdy ekenin, bul densaýlyq pen ońaltý úshin mańyzdy ekenin atap ótti.

«Erekshe qajettiligi bar balalarǵa úıirmeler men sektsııalar kóbirek ashylýy úshin jaǵdaı jasaý kerek. Men bul máselege sport federatsııasynyń nazaryn aýdarǵym keledi. Sebebi barlyq sport nysandarynda múmkindigi shekteýli balalarǵa arnalǵan úıirme joq. Tipti osy ádemi Jekpe-jek saraıynda mundaı balalarǵa arnalǵan birde-bir bólim joq», - deıdi A. Sálimbaeva.

Oıyndardyń aǵa tóreshisi Marǵulan Qııaqov ta «Juldyzaı» qoǵamdyq qorynyń barlyq óńirlerden balalardy shaqyryp, ınklıýzıvti oıyn ótkizetin jalǵyz joba ekenin aıtty.

«Bul jerde tek sport qana emes, sporttan da mańyzdy tustar bar dep oılaımyn. Mysaly balalar úlken qalaǵa keledi, mádenıetti oryndarǵa baryp, qyzyqty nárselerdi kóredi. Ekinshiden, basqa da balalarmen tanysyp, aralasady. Sodan keıin sporttyq jetistikterdi aıtýǵa bolady. Mundaı sporttyq sharalar jylyna bir ret emes, birneshe ret ótýi kerek dep oılaımyn. Óıtkeni bul jarystar balalardy qyzyqtyryp, sportqa baýlıdy, sol arqyly úlken dárejege jetýge umtylady. Aldaǵy ýaqytta jarystyń erejesin durystap, naqtylap, kelesi jyly budan da jaqsy ótkizýge tyrysamyz», - deıdi aǵa tóreshi.

Nátıjesinde jalpykomandalyq esepte 16 óńir arasynda Almaty qalasy 73 medalmen kósh bastady. Ekinshi orynda Pavlodar oblysy (53), úshinshi orynda – Aqmola oblysy (44) tur. Úzdik bestikti Qaraǵandy (29), Aqtóbe (34) oblystary túıindedi.