Júlde qory 11 mln. teńge bolatyn NIF$50K ınnovatsııalyq bıznes josparlar respýblıkalyq baıqaýyna 300-ge jýyq ótinish tústi
Bul byltyrǵy jylmen salystyrǵanda 1,5 esege artyq, dep habarlady Tehnologııalyq damý jónindegi ulttyq agenttiktiń baspasóz qyzmetinen.
Ótinishter respýblıkanyń barlyq aımaqtarynan kelip túsken. Onyń ishinde, eń kóp kólemde Almaty qalasynan - 54, Aqmola oblysynan - 33, Astana qalasynan - 28 ótinish kelip tússe, eń az kólemde Qyzylorda oblysynan - 2, Pavlodar oblysynan - 4, Qostanaı oblysynan - 7 ótinish qabyldanǵan.
Baıqaýǵa qatysýshylar aýyl sharýashylyǵy (mysaly, vırýssyz negizde qartoptyń erekshe tuqymyn ósirip shyǵarý), energetıka (elektroenergııany tıimdi qoldaný maqsatyndaǵy jańashyldyqtar), medıtsına (jabaıy dárilik ósimdikterden azyq-túlik óndirý), tehnologııalardy (jańa) jetildirý/engizý (gıdromashına, generator, t.b.), qaldyqsyz óndiris (kremnıı óndirisiniń qaldyqtarynan alıýmınıı alý úshin lıgatýra óndirýdi uıymdastyrý) salalary boıynsha ınnovatsııalyq usynystar jasdy.
Esterińizge sala keteıik, «Tehnologııalyq damý jónindegi ulttyq agenttik» AQ baıqaýǵa ótinish qabyldaýdy ústimizdegi jylǵy 18 maýsym kúni bastaǵan bolatyn. Baıqaýdy jan-jaqty aqparattandyrý maqsatynda 2012 jylǵy 9 tamyz kúni «Innovatsııalyq forsaj» arnaıy belgilerimen avtobýs aımaqtardy aralaýǵa attandy. Bul sharanyń maqsaty - baıqaý jóninde barlyq aımaqty jan-jaqty aqparattandyrý, áleýetti qatysýshylar sanyn arttyrý, jergilikti oryndarda ótinishter qabyldaý, qazaqstandyqtardyń ınnovatsııalyq belsendiligin arttyrý. Tamyz aıy ishinde avtobýs 14 oblys pen Astana, Almaty qalalaryn aralap shyqty.
Tuńǵysh ret NIF$50K baıqaýy Qazaqstanda 2005 jyly ótti. Baıqaý maqsaty turǵyndardyń ınnovatsııalyq belsendiligin arttyryp, ınnovatsııalyq kásipkerlikti nasıhattaý bolatyn. 2010 jyly «Innovatsııalyq forsaj» ataýymen baıqaýdyń alǵash ret televızııalyq nusqasy paıda boldy. Bıyl teleshoý qazan aıynan bastap «Habar» telearnasynan kórsetiledi.
Baıqaýdyń erejesine sáıkes, barlyq jınalǵan ótinishter ishinen Sarapshylar komıssııasy 25 úzdik ınnovatsııalyq jobany iriktep alady. Úzdik jobalardyń avtorlary teleshoý qatysýshylary atanady. Sonymen qatar, qatysýshylardy Deloitte konsaltıng kompanııasynyń kásibı bıznes-jattyqtyrýshylary arnaıy kásipkerlikke baýlıtyn bolady. Baıqaý jeńimpazy 7,5 mln.teńge kólemindegi grantqa ıe bolady, 2 oryn - 2,5 mln.teńge, 3 oryn - 1 mln.teńgeni ıelenedi.