Júlde qory 100 000 AQSh dollary: Astanada qazaq kúresiniń kil myqtylary anyqtalady

<p>ASTANA. KAZINFORM - 2025 jyldyń 11 qańtarynda elordadaǵy Jaqsylyq Úshkempirov atyndaǵy jekpe-jek saraıynda ulttyq brendimiz &ndash; qazaq kúresinen &laquo;Dala qyrandary&raquo; respýblıkalyq týrnıri ótedi.</p>

Elimizdiń eń úzdik balýandarynyń bir kilemde sheberligin kórsetýge múmkindik beretin bul sporttyq shara jyl basynyń jarqyn bastamasy bolmaq.

Jarystyń basty maqsaty – qazaq kúresin nasıhattaý, sporttyq dástúrlerdi nyǵaıtý jáne qatysýshylardyń sheberligin arttyrýǵa baǵyttalǵan. Sondaı-aq, atalǵan týrnırde 8 salmaq dárejesindegi Qazaqstannyń eń úzdik 8 balýany anyqtalady.

Aıta ketsek, 2024 jyldyń basynan bastap Qazaqstanda qazaq kúresi boıynsha 5 reıtıngilik jarys ótti. Bul jarystardyń nátıjesinde ár salmaq dárejesinde eń kóp upaı jınaǵan úzdik 8 balýan anyqtaldy. Endi, mine, óz salmaǵynyń úzdikteri elordadaǵy bási bıik doda barysynda «Dala qyrany» tıtýly úshin kúresýge múmkindik alyp otyr.

Sóıtip, tek 8 jeńimpaz óz salmaq dárejesiniń «Bas balýany» ataǵyna ıe bolady. Sonymen qatar jeńimpazdar qomaqty aqshalaı syılyqtarmen marapattalady. Jarystyń júlde qory – 100 000 AQSh dollary.

Týrnırge qatysatyn tanymal balýandar:

Jumajan Qojambekov – eki márte álem chempıony, 5-shi Dúnıejúzilik Kóshpendiler oıyndarynyń jáne Dúnıejúzilik jekpe-jek oıyndarynyń jeńimpazy.

Ersultan Muzapparov – álem chempıony, 5-shi Dúnıejúzilik Kóshpendiler oıyndarynyń jeńimpazy.

Altynbek Aýsaǵıtov – Azııa jáne Álem kýbogtarynyń jeńimpazy.

Nurdáýlet Jarylǵapov – álem jáne Azııa chempıony, «Dala qyrandary» RT eki dúrkin chempıon.

Erasyl Qajybaev – «Qazaqstan barysy – 2024» týrnıriniń jeńimpazy, eki dúrkin kúmis júldeger.

– Bıylǵy týrnırdiń basty ereksheligi – shoý elementteriniń engizilýinde: tanymal qazaqstandyq sportshylar Rýslan Ábdirazaqov, Saıat Shámshıev jáne Vasılıı Tahtaı boz kilemde MMA sportshylary Farıd Abdýllaev, Islam Djangorazov jáne Danıl Elbaevqa qarsy shyǵyp, qazaq kúresiniń erejesi boıynsha kúresedi. Sóıtip, bul qadam jurtshylyqtyń dástúrli týrnırimizge degen qyzyǵýshylyǵyn arttyra túsip, jarysqa jańa lep beredi degen senimdemiz, – deıdi jarysty uıymdastyrýshylar.

Bul sporttyq oqıǵa tek kásibı sportshylar men sport áýesqoılaryn ǵana emes, sondaı-aq Qazaqstannyń ulttyq mádenıetine qyzyǵatyn keń aýdıtorııany da qyzyqtyratyny dep josparlanǵan.

Esterińizge sala keteıik, osyǵan deıin 2025 jyly Qytaıda qazaq kúresinen álem chempıonaty ótýi múmkin ekenin jazǵan bolatynbyz.

Esterińizge sala keteıik, qazaq kúresinen eresekter arasyndaǵy Qazaqstan Respýblıkasy chempıonatynyń demeýshisi – Sport Qory cportty qoldaý qory.