Júkti áıelder járdemaqyny úıden shyqpaı, SMS arqyly rásimdeı alady

NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi Elektrondyq eńbek bırjasy (budan ári – EEB) portalynda júktilikke jáne bosanýǵa baılanysty tabystan aıyrylǵan jaǵdaıda tólenetin áleýmettik tólemderdi proaktıvti formatta taǵaıyndaýǵa múmkindik beretin jańa fýnktsıonaldy iske qosyldy. Bul týraly QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap habarlaıdy.

Osy jyldyń mamyr aıynan bastap EEB-da Qazaqstannyń jumys berýshileri úshin júktilikke jáne bosanýǵa baılanysty áleýmettik demalystardy Eńbek sharttaryn esepke alýdyń biryńǵaı júıesinde tirkeý múmkindigi berildi. Osynyń arqasynda demalysqa shyqqan qyzmetkerlerge tıisti áleýmettik tólemdi taǵaıyndaýdy ótinish berýshiniń qatysýynsyz proaktıvti formatta júzege asyrýǵa bolady. Bul kórsetiletin qyzmetti alýshylarǵa osy tólemdi alýǵa ótinish berý úshin halyqqa qyzmet kórsetý ortalyǵyna jeke barmaýǵa múmkindik beredi.

Júktilikke jáne bosanýǵa baılanysty áleýmettik demalysqa shyqqan jumyskerge tólemdi proaktıvti túrde taǵaıyndaý úshin jumys berýshi jumyskerdiń shyǵý faktisin EEB portalyndaǵy jeke kabınette tirkeýi qajet. Derekter Eńbek sharttaryn esepke alýdyń biryńǵaı júıesine jiberiledi, odan suraý salý boıynsha áleýmettik tólemder taǵaıyndaý úshin «Azamattarǵa arnalǵan úkimet» memlekettik korporatsııasy» KEAQ-ǵa beriletin bolady. Bul rette, kórsetiletin qyzmetti alýshyǵa SMS-habarlama arqyly proaktıvti formatta áleýmettik tólem taǵaıyndaýǵa kelisimin alý boıynsha suraý túsedi, oǵan úsh kún ishinde jaýap berý qajet bolady.