Júk jetkizý merzimi qysqarady: Almatyda jańa temirjol qurylysy bastaldy
Memleket basshysynyń tapsyrmasy boıynsha eldiń kólik-tranzıttik áleýetin damytýda mańyzy zor ınfraqurylymdyq joba iske asyrylyp otyr. QR Premer-Mınıstri Álıhan Smaıylov temirjol jelisiniń alǵashqy býynyn tóseý rásimine qatysty.
2022 jyly Qazaqstan men Qytaı arasyndaǵy temirjol júk tasymaly 23 mln tonnadan artyp, tarıhı maksımýmnan asty. 2023 jyldyń basynan beri atalǵan kórsetkish taǵy 22%-ǵa ósti. Mundaı jaǵdaıda negizgi halyqaralyq baǵyttardyń qıylysynda ornalasqan Almaty temirjol torabyna júkteme artyp otyr.
Sonymen qatar jobany iske asyrý Almaty stansasyn aınalyp ótetin Jetigen – Qazybek bek jańa temirjolyna júk aǵynyn qaıta baǵyttaýǵa múmkindik beredi. Jalpy, jańa jeli Almaty torabyndaǵy júktemeni 40%-ǵa azaıtyp, júk jetkizý ýaqytyn edáýir qysqartady.
Álıhan Smaıylov «Altynkól-Qorǵas» shekaralyq ótkeli arqyly ótetin temirjol baǵyty sońǵy jyldary qarqyndy ósim kórsetkenin atap ótti.
«Atalǵan tranzıttik dálizde Almaty temirjol toraby Shý, Aqtoǵaı, Altynkól jáne Almaty-2 baǵyttary boıynsha poıyzdardyń qozǵalysyn qamtamasyz etedi. Jobany iske asyrý júkterdi jetkizý merzimin 2 esege qysqartady», — dedi Premer-Mınıstr.
Ol sondaı-aq, jobany júzege asyrý barysynda qazaqstannyń úlesi keminde 85% bolatynyn aıtty. Qurylys kezinde 1400 adam jumyspen qamtylyp, jeli iske qosylǵanda shamamen 500 adamǵa turaqty jumys orny ashylady.
«Shpal, relster men transformatorlar shyǵarýdy, ınertti materıaldar, qum jáne qıyrshyq tastardy jetkizýdi jergilikti kompanııalar júzege asyrady», — dedi Álıhan Smaıylov.
Jalpy qurylys protsesinde 130 km temirjol, 3 stansa, 13 kópir, 5 t/j jáne 1 avtokólik ótkeli salynady.
Resmı is-sharada qurmetti temirjolshy, eńbek ardageri Qaltaı Sámbetov sóz sóıledi.
«Jetigen – Qazybek bek beketteriniń arasynda temirjolshylar kópten kútken jol qurylysy bastaldy. Bul joldyń mańyzy zor, óıtkeni ol el ekonomıkasynyń damýyna, ósip-órkendeýine yqpal etedi. Atalǵan temirjol baǵyty Qazaqstan men Qytaı, Ortalyq Azııa men Reseı arasyndaǵy tranzıttik múmkindikterdi edáýir arttyrady», — dedi ol.
Otandyq ónimniń úzdiksiz eksportyn qamtamasyz etý jáne júk tranzıtin keńeıtý maqsatynda Qazaqstanda temirjol ınfraqurylymyn damytý boıynsha belsendi jumys jalǵasyp jatqanyn aıta ketken jón. Osylaısha, ótkizý qabiletin arttyrý úshin Dostyq – Moıynty ýchaskesinde ekinshi joldar salynýda. Jaqyn arada Qytaımen úshinshi halyqaralyq túıisý núktesine shyǵatyn Darbaza – Maqtaaral jáne Baqty – Aıagóz temir jol jelileriniń qurylysyn bastaý josparlanyp otyr. Úsh jyl ishinde barlyǵy 1300 shaqyrymnan astam temirjol salynady.
«Búgin biz Almaty torabyn aınalyp ótetin temirjol jelisiniń qurylysyn bastaımyz. Ol Ortalyq Azııaǵa, Eýropaǵa jáne Kaspıı teńizi porttaryna baǵyttalǵan tranzıttik júkterdiń ótýin jyldamdatady. Bul jeli sońǵy ýaqytta qarqyndy damyp kele jatqan Almaty torabyn jeńildetý úshin óte qajet. Ásirese, Almatynyń mańy. Ónerkásip damyp keledi. Ótkizý qabiletin qajet etetin kólik-logıstıkalyq ortalyqtar salynýda», — dedi «QTJ» UK» AQ Basqarma tóraǵasynyń orynbasary Qanat Álmaǵambetov.
Onyń aıtýynsha, búgin Almaty torabyna keletin júk 1,5–2 táýlikke keshigip jatyr. Alaıda, jańa temirjol jelisiniń arqasynda toraptyń jumysy aıtarlyqtaı jaqsarady.
«Meniń oıymsha, munda qyzmet kórsetiletin barlyq júk jóneltýshiler men júk alýshylar muny birden sezinedi. Bul jumys elimizdiń kólik-logıstıkalyq múmkindikterin damytýǵa qatysty Prezıdenttiń Joldaýyn iske asyrý sheńberinde júrgizilip otyr. Búginde respýblıkada júkterdi jedel ótkizý úshin shyn máninde qolaıly jaǵdaılar jasalýda», — dep atap ótti Qanat Álmaǵambetov.