Júkti artyq tıegen kólikter tolyqtaı avtomattandyrylǵan tártipte anyqtalady

<p>ASTANA. KAZINFORM &ndash; 4 jeltoqsannan elordaǵa negizgi kireberis joldarda júk kólikterin avtomattandyrylǵan tártipte ólsheý júıesi &laquo;Sergek&raquo; qaǵıdaty boıynsha jumys isteıdi. Bul týraly Kólik mınıstrligi Avtomobıl kóligi jáne kóliktik baqylaý komıtetiniń Ahýaldyq ortalyǵy basshysynyń mindetin atqarýshy Sultan Musaǵalıev aıtty.</p>

«Bul testileýden ótkizilip jatqan joba emes. Ákimshilik quqyq buzýshylyq týraly kodeksinde júkti shamadan tys tıegen kólikterge qatysty arnaıy bap bar. Buǵan deıin avtomattandyrylǵan ólsheý júıesi arqyly baqylaýdyń tásili iske qosylǵan edi. Atap aıtqanda, qazir jartylaı avtomattandyrylǵan júıe jumys istep tur. Bul rette maman salmaq erejesin buzǵandardy anyqtap, tıisti nusqamany júk tasymaldaýshylarǵa joldap jatyr. Al 4 jeltoqsannan osy nusqamalar tolyqtaı avtomattandyrylǵan tártipte baǵyttalady. Artyq salmaq tıegender «Sergek» qaǵıdaty boıynsha anyqtalyp, aıyppul joldanady, júıe avtomatty túrde jumys isteıdi. Adamı faktor bolmaıdy. Osy oraıda jaqsy úrdisti baıqap otyrmyz, ıaǵnı olar júkti ruqsat etilgen deńgeıde tıep jatyr», - dedi S. Musaǵalıev elordada tilshiler suraǵyna jaýap bere otyryp.

Onyń aıtýynsha, elorda aýmaǵynda qazir 7 ólsheý júıesi ornatylǵan jáne onyń beseýi qosyldy. Bıyl 6 qyrkúıekten bastap kólik salasyndaǵy baqylaý ınspektsııasy 235 mln teńgege 632 kólik boıynsha uıǵarymdy joldady. Sonymen qatar taǵy 70-ke jýyq uıǵarym kólik ıelerine baǵyttalady.

«Jalpy, bazada aýyr salmaqty kólikter boıynsha 13 myń ereje buzý jınaqtalǵan. Biraq onyń 12 myńnan astamy avtokólikterdiń memlekettik nómirleriniń anyqtalmaýyna baılanysty sál kidirip tur. Sondyqtan tek 632-sine aıyppul salyndy. Júk kólikteriniń júrgizýshileri atalǵan ólsheý júıesine jaqyndaǵan kezde memlekettik nómirlerin búrkep jaýyp tastaýy nemese ólsheý stantsııasynan aınalyp ótýi áreketterin jasap jatyr», - dedi vedomstvo ókili.

Atap aıtqanda, búgin Astana qalasy Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńesiniń otyrysynda júk tasymaldaýshylar atalǵan júıe arqyly keıbir aıyppuldar negizsiz kelip jatqanyn aıtty.

Óz kezeginde Astana qalasy Kólik jáne jol-kólik ınfraqurylymyn damytý basqarmasynyń ókilderi avtomattandyrylǵan ólsheý júıesindegi qurylǵylar tıisti sertıfıkattaýdan ótkenin málim etti.

Budan buryn habarlanǵandaı, bıyl qyrkúıek aıynda Astana qalasyna negizgi kireberis joldarda avtomattandyrylǵan ólsheý júıesi iske qosyldy.