Júk ushaǵy Kosta-Rıka áýejaıyna shuǵyl qonǵan kezde ekige bólinip ketti

SAN-HOSE. QazAqparat – DHL júk ushaǵy Kosta-Rıka astanasyna apattyq qoný kezinde ushý-qoný jolaǵynan taıyp ketip, ekige bólingen, dep habarlaıdy QazAqparat Independent basylymyna silteme jasap.

Apat «DHL» kompanııasyna tıesili Boeing 757-200 júk ushaǵynyń qatysýymen bolǵan.

Áýe kemesiniń eki ushqyshy evakýatsııalandy. Ekeýi de jaraqat alǵan joq.

Sonymen qatar, DHL «ekıpajdyń bir múshesi saqtyq sharasy retinde medıtsınalyq tekserýden ótedi» dep málimdedi.

Kosta-Rıka bıliginiń habarlaýynsha, Gvatemalaǵa bet alǵan ushaqtyń gıdravıkalyq júıesi isten shyqqan.

Sol sebepti ushqysh San-Hose áýejaıyna shuǵyl qonýǵa májbúr bolǵan.

Apatty qoný kezinde ushaq ushý-qoný jolaǵynan shyǵyp ketip, artqy bóligi julynyp túsken, dep habarlaıdy Reuters.

Atalǵan oqıǵadan keıin «Hýan Santamarııa» halyqaralyq áýejaıy birneshe saǵatqa jabylǵan.

Áýe aılaǵy operatorynyń aıtýynsha, apat AQSh, Ortalyq Amerıka, Meksıka, Kanada jáne Eýropaǵa baǵyt alǵan 57 kommertsııalyq jáne júk reısterine, sondaı-aq 8500 jolaýshyǵa áserin tıgizgen.

«DHL» kompanııasy tıisti organdarmen tergeýdi bastaýǵa ýáde berip, oqıǵaǵa áreket etý tobyn iske qosqanyn habarlady.