Júk tasıtyn áýe kompanııanyń bortserigi 27 mln teńgeniń krıptovalıýta óndiretin jabdyqtaryn urlaǵan

ALMATY. QazAqparat – Almatyda júk tasymalymen aınalysatyn áýe kompanııalarynyń biriniń bortserigi asa iri kólemde urlyq jasaǵany úshin aıyptalyp otyr, dep habarlaıdy QazAqparat Kóliktegi polıtsııa departamentiniń baspasóz qyzmetine silteme jasap.

«Almaty qalasy halyqaralyq áýejaıyndaǵy Jelilik polıtsııa bóliminiń qyzmetkerleri jedel-izdestirý is-sharalaryn ótkizý barysynda Qytaı halyq respýblıkasynan Qazaqstan Respýblıkasyna júk tasymalymen aınalysatyn áýe kompanııalarynyń biriniń bortserigin asa iri kólemde urlyq jasaǵany úshin anyqtap, ustady», delingen habarlamada.

Tergeý barysynda atalǵan bortseriktiń tasymaldanatyn júkke erkin ený múmkindigin paıdalanyp, áýe kemesiniń júk bóliginen krıptovalıýtany óndirýge arnalǵan jabdyqty birneshe ret urlaǵany anyqtaldy.

Jalpy keltirilgen shyǵyn somasy 27 mln teńgeden asady.

Departamenttiń habarlaýynsha, qazir sotqa deıingi tergeý aıaqtalyp, qylmystyq is sotqa joldanǵan.