Júk kólikteriniń salmaǵyn ólsheıtin stantsııalar sany kóbeıýi múmkin
- Halyq kóterip otyrǵan taǵy bir úlken másele – avtomobıl joldaryn buzatyn aýyr júk tasymaldaıtyn mashınalar. Bul júk kólikteriniń salmaq parametrlerin ólsheıtin avtomattandyrylǵan stantsııalardyń qajetti sanynyń bolmaýynan týyndap otyr. Elimizde 50-ge jýyq avtomattandyrylǵan ólsheý ortalyǵy ornatylǵan. Shamadan tys júkteme anyqtalǵan kezde derekter tirkelip, aıyppul salý úshin ýákiletti organdarǵa beriledi. Osyǵan baılanysty oryndalatyn jumystar men qoldanylatyn materıaldardyń sapasy boıynsha máseleni sheshetin ýaqyt keldi. Sondaı-aq oryndalǵan jumystardyń sapasy boıynsha anyqtalǵan buzýshylyqtar úshin birinshi basshylardyń derbes jaýapkershiligin kúsheıtip, avtomattandyrylǵan ólsheý stantsııalarynyń sanyn kóbeıtý kerek, - dedi Nurtaı Sabılıanov.
Osy oraıda Májilis deptýtaty Memleket basshysy 2029 jylǵa deıin 4 myń shaqyrymnan astam avtomobıl joldaryn sapaly túrde rekonstrýktsııalaý mindetin qoıǵanyn atap ótti.
- Búgingi tańda Memleket basshysynyń tapsyrmasyna sáıkes, «uzaqqa sozylǵan qurylys» jobalaryn iske asyrý boıynsha aýqymdy jumys atqaryldy. Degenmen, qurylysyn aıaqtaýdy jáne jóndeý júrgizýdi qajet etetin avtomobıl joldary bar. Mysaly, «Qalbataý - Maıqapshaǵaı» tas jolyn jóndeý 2019 jyldan beri 5 jylǵa jýyq ýaqyt júrgizilip keledi. Biraq jóndeý jumystary áli kúnge deıin aıaqtalǵan joq. Sonymen birge respýblıkalyq mańyzy bar «Qyzylorda – Jezqazǵan» avtojoly eń úlken másele bolyp otyr. Osy ýchaskeni jóndeý jumystaryn aıaqtaýdy jedeldetý qajet», - dedi ol.
Sonymen qatar onyń aıtýynsha, respýblıkalyq mańyzy bar Qaraǵandy-Aıagóz-Buǵaz avtojolynyń jaı-kúıi qanaǵattanarlyq jaǵdaıda emes ári jekelegen ýchaskelerinde tipti asfalt jabyny múldem joq.
- Bul másele osy óńirdiń turǵyndary arasynda jıi kóteriledi. Sondyqtan mınıstrlik osy máselelerdi sheshý jóninde sharalar qabyldaýy qajet, - dedi Májilis depýtaty.