Astanaǵa kireberiste júk kólikteriniń salmaǵyn ólsheıtin júıe iske qosyldy

<p>Astana qalasyna negizgi kireberis joldarda avtomattandyrylǵan ólsheý júıesi iske qosyldy. Qurylǵy joldardyń buzylýyna jol bermeýge yqpal etedi. Júk kólikteri júk tasymaldaý barysynda belgilengen normadan asqan jaǵdaıda ákimshilik sharalar qarastyrylǵanyn umytpaǵan jón.</p>

Avtomattandyrylǵan ólsheý júıeleri iske qosylǵan sátten bastap ınspektsııa qyzmetkerleri salmaq parametrlerin ustanbaý jáne júrgizýshilerdiń zań talaptaryna baǵynbaý faktilerin tirkep otyr. Máselen, bundaı oqıǵa jaqynda Astananyń aınalma jolynda, naqtyraq aıtsaq Qyzylsýat aýylynyń mańynda tirkeldi.

Birneshe júk kóliginiń júrgizýshileri kóliktik baqylaýdan bas tartyp, oqıǵa ornynan qashyp ketip qalýǵa tyrysqan. Oqıǵa barysynda aýyr júk kólikteriniń biri ınspektsııanyń qyzmettik mashınasyna mehanıkalyq zaqym keltirdi. Júrgizýshi ustalyp, ýaqytsha ustaý ızolıatoryna ornalastyryldy, al kólik aıyppul turaǵyna jiberildi.

«Aýyr júk kólikterin júrgizýshilerden erejelerdi qatań saqtaýǵa jáne belgilengen salmaq parametrlerinen aspaýǵa shaqyramyz. Bul normalardy buzý ákimshilik jaýapkershilikke ákep soǵady», - dep atap ótti Avtomobıl kóligi jáne kóliktik baqylaý komıtetiniń tóraǵasy Altaı Áli.

Esterińizge sala keteıik, «Avtomobıl kóligi týraly» QR Zańynyń 19-2-babyna sáıkes QR KM Avtomobıl kóligi jáne kóliktik baqylaý komıtetiniń negizgi fýnktsııalarynyń biri respýblıka aýmaǵynda iri kólemdi jáne aýyr salmaqty avtokólik quraldarynyń júrýin baqylaý bolyp tabylady.

Aıyppuldardyń mólsheri oske shaqqandaǵy salmaqtyń artý dárejesine baılanysty jáne kásipkerlik túrine baılanysty – shaǵyn, orta nemese iri – 40 AEK-ten (147 myń 680 teńge) 1000 AEK-ke (3 mln 692 myń teńge) deıin quraıdy.

Osylaısha, kólik quraldarynyń ruqsat etilgen massasy tómende keltirilgen normadan (tonnamen) aspaýy tıis:

-úsh osti (M3 sanatyndaǵy býyndy avtobýstardy qospaǵanda) – 25 tonna;
- tórt osti, onyń ishinde eki basqarylatyn osi bar – 32 tonna;
- bes osti – 38 tonna;
- alty nemese odan da kóp osteri bar – 44 tonna.

Joldardyń merziminen buryn tozýyna alyp keletin negizgi faktorlardyń biri ruqsat etilgen massadan artyq júk tıegen avtokólik quraldary ekenin atap ótken jón. Joǵaryda atalǵan sharalar avtomobıl joldarynyń merziminen buryn buzylýy men tozýyn boldyrmaýǵa, sondaı-aq aýyr jáne iri kólemdi kólik quraldaryn qadaǵalaýǵa múmkindik beredi.