Júk kóliginiń dońǵalaǵy ushyp ketip, aıaldamadaǵy áıeldi soqqan

ASTANA. QazAqparat - Mınskide júrip bara jatqan júk kóliginiń dóńgelegi ushyp ketip, aıaldamada turǵan áıeldi soqty, dep habarlady BELTA . 

 Zavodskoı AІІB OMAI aǵa ınspektory Anastasııa Zabavskaıanyń aıtýynsha, oqıǵa búgin saǵat 9.20-da Partızanskıı dańǵylynda bolǵan.

«Aldyn ala aqparat boıynsha, konteıner tasymaldaıtyn júk kóligi ketip bara jatqanda dońǵalaǵy julynyp ketken. Ol dóńgelegen kúıi aıaldamada turǵan 40 jastaǵy áıeldi basyp qalǵan. Oqıǵa ornyna kelgen dárigerler zardap shegýshige bas súıek-mıy zaqymdanýy degen dıagnoz qoıdy. Sondaı-aq, ol túrli dene jaraqattaryn alǵan», - dedi Anastasııa Zabavskaıa.

Aldyn ala derek boıynsha, júrgizýshi jolǵa shyǵardan buryn kóliktiń tehnıkalyq jaǵdaıyn teksermegen.