Jýyný bólmesinde jasyryn vıdeoǵa túsirgen: Atyraýda burynǵy áıelin bopsalaǵan er adam sotaldy
Atyraý oblystyq sotynyń qylmystyq ister jónindegi sot alqasynda buryn bas bostandyǵy shektelgen er adamǵa qatysty qylmystyq is apeellıatsııalyq tártippen qaraldy.
«Sottalýshy men jábirlenýshiniń arasyndaǵy zańdy neke buzylǵan. Olardyń kámeletke tolmaǵan ortaq nekedegi 5 balasy anasynyń qamqorlyǵynda qalǵan. Neke buzylǵannan keıin jubaıy ápkesiniń úıinde turǵan. Er adam sol úıdiń aýlasyna zańsyz kirip, jýynatyn bólmeniń terezesinen olardyń jalańash beınesin beınejazbaǵa túsirgen. Kelesi kúni ol burynǵy jubaıyn notarıýsqa shaqyryp, sol jerde odan ortaq úı qunynyń bir bóligin berý týraly qolhat jazýdy talap etken. Al bas tartqan jaǵdaıda túsirilgen beınejazbany ınternet jelisinde taratamyn dep qorqytqan. Jábirlenýshini qolhat jazýǵa májbúrlep, ózinshe bılik etken», - dep habarlady oblystyq sottyń baspasóz qyzmeti.
Birinshi satydaǵy sot taǵaıyndaǵan jaza sottalýshynyń jeke basyna, istiń mán-jaılaryna jáne jasalǵan quqyq buzýshylyq áreketterine sáıkes kelmeıtini anyqtalǵan. Jábirlenýshiniń aıtýynsha, sottalýshy quqyq qorǵaý organdarynyń ózine jáne onyń balalaryna jaqyndamaý týraly buıryǵyna qaramastan, úkim shyǵarylǵannan keıin de oǵan tynyshtyq bermegen. Ózine qarsy zańsyz áreketter jasap, ony ańdyp júrgen jáne balaǵattaǵan.
«Qazirgi ýaqytta ishki ister organdarymen sottalýshyǵa qatysty balasyn ózin-ózi óltirýge deıin jetkizý boıynsha qylmystyq istiń tergelip jatqany anyqtaldy. Sot baıandalǵandardy eskere otyryp, úkimdi ózgertti. Sottalýshy QR Qylmystyq kodekstiń 389-babynyń 3-bóligimen naqty 1,5 jylǵa bas bostandyǵynan aıyryldy. Ol sot zalynan qamaýǵa alyndy. Jábirlenýshiniń apellıatsııalyq shaǵymy qanaǵattandyryldy», - dep málim etti oblystyq sottyń baspasóz qyzmetinen.
Eske sala ketelik, budan buryn Atyraýda seriktestik dırektorynan 6 mln teńge para alǵan sheneýnik 4 jylǵa sottaldy.
Sondaı-aq, Atyraýda qarjy pıramıdasyn qurǵan zeınetkerge sot úkimi shyqty.