Judyryq ala júgiretinderdi emdeý kerek - Bas prokýror Asanov
Onyń aıtýynsha, turmystyq zorlyq-zombylyqtyń aldyn alýǵa arnalǵan zańnamada jábir kórgen adamnyń quqyqtaryn qorǵaý sharalary qarastyrylǵan. Alaıda sol jábirdi kórsetken adammen tıisti jumysty júrgizý tetikteri joq. Osy oraıda Bas prokýror qazirgi medıtsınalyq aıyqtyrǵyshtardyń ornyna psıxologııalyq kómek berý ortalyqtaryn ashýdy usyndy.
"Shyn máninde, agressor degen ol - aýrý adam. Árıne, ol ózi sony moıyndamaıdy. Onyń tili joq, áńgimeni durys júrgize almaıdy. Ol eshkimdi kóndire almaıdy, sendire almaıdy. Sosyn "tili joq" bolǵasyn yzylansa, judyryǵyn ala júgiredi. Sondyqtan ondaı adamdardy biz emdeýimiz kerek. Taǵy aıtaıyn, olar ózderiniń aýrý ekenderin bilmeıdi. Moldovada úsh jyldan beri agressorlarǵa arnalǵan ortalyq jumys isteýde. Onda buzaqy ne óz erkimen, ne sot arqyly emdeledi. Bizge de sondaı psıxokorrektsııalyq qyzmet kerek. Oǵan qarajat joq deımiz. Biraq túk paıdasy joq medıtsınalyq aıyqtyrǵyshtarǵa jyl saıyn 5 mılııard teńge bólip otyramyz. Odan da olardyń ornynan Moldova sııaqty psıxologııalyq ortalyqty qursaq, durys bolar edi", - dedi Bas prokýror búgin turmystyq zorlyq-zombylyq máselelerine arnalǵan jıynda.
Aıta keteıik, óz baıandamasyn tolyǵymen memlekettik tilde jasaǵan Jaqyp Asanov óz ómirinen bir oqıǵa jaıynda baıandap berdi . Budan bólek ol naqty statıstıkany keltirdi. Elimizde áıel adamdarǵa qatysty qylmystardyń sany 90 paıyzǵa ósti. Árbir úshinshi qylmys otbasy jaǵdaıynda boldy. Ótken jyly 36 áıel jáne bir bala qaıtys bolsa, 2 481 áıel men 851 bala zorlyq-zombylyqtyń qurbanyna aınaldy. 742 áıel men kámelettik jasqa tolmaǵan 175 jas óz-ózine qol saldy.
Bas prokýrordyń oıynsha, mektepte qajetsiz pánderdiń ornyna ómirge paıdaly bilim berý kerek . Sonymen qatar Asanov myrza úılenemin deýshilerge arnalǵan mindetti kýrs engizýdi usyndy . Al áıelin urǵan erkekter aldaǵy ýaqytta on táýlikke qamalýy ábden múmkin .