Judyryǵyn ala júgiretinderden qorǵaýda jańa zańnyń orny bólek – Baný Nurǵazıeva

NUR-SULTAN. QazAqparat – Qazaqstan Azamattyq alıansynyń prezıdenti Baný Nurǵazıeva elimizdegi otbasylyq zorlyq-zombylyq máselesine alańdatýshylyq tanytty. Aıta keteıik, atalǵan problemany QR Prezıdenti bıylǵy Joldaýynda kótergen edi, dep habarlaıdy QazAqparat tilshisi.

«Ónegeli urpaq berekeli otbasynda tárbıelenedi. Ókinishke qaraı, jyl sanap elimizde tatý-tátti, aırandaı uıyǵan otbasylardyń sany azaıyp barady. Prezıdent Joldaýynda kóterilgen basty máseleniń biri - adam quqyǵynyń qorǵalýy. Ásirese otbasyndaǵy turmystyq zorlyq-zombylyq máselesi bizdiń elde ózekti bolyp tur. Zorlyq-zombylyq sıpatyndaǵy qylmystardyń 6-7 paıyzy otbasynda jasalady. BUU statıstıkasyna júginsek, jyl saıyn 3,5 mln adam otbasynda bolatyn turmystyq zorlyq-zombylyqqa ushyraıdy. Otbasynda japa shegýshilerdiń 90 paıyzy – áıelder», - dedi Baný Nurǵazıeva.

Onyń aıtýynsha, zańdy qatańdatýdaǵy maqsat - qoǵamnyń álsiz tobyn qorǵaý. Onyń qatarynda qyz-kelinshekter, balalar men jasóspirimder jáne qarttar bar.

«Zorlyq-zombylyq sıpatyndaǵy quqyq buzýshylyq elimizdiń qylmystyq jáne ákimshilik kodeksinde áldeqashan anyqtalyp qoıǵan. Al judyryǵyn ala júgiretinderden qorǵaýda jańa zańnyń orny bólek. Otbasylyq zorlyq-zombylyqtyń jolyn kesýde keshendi quqyqtyq mehanızm kerek. Eýropa elderiniń statıstıkasyna qarasaq, pedofılııanyń 30 paıyzy – otbasy músheleriniń, 40 paıyzy - týysqandary tarapynan bolyp jatady. Osy oraıda zań óte qajet», - deıdi ol.

Sondaı-aq, Baný Nurǵazıeva otbasylyq zorlyq-zombylyqpen kúreste Qazaqstannyń Azamattyq alıansy tarapynan atqarylyp jatqan jumystarǵa toqtalyp ótti.

«Aqmola oblysynyń Stepnogor qalasynda «Áıel jylýy» (Jenskıı lých) atty qoǵamdyq birlestik bar. Atalǵan uıym 2018 jyldan bastap turmystyq zorlyq-zombylyq qurbandaryna áleýmettik qoldaý kórsetip keledi. Osy ýaqytqa deıin ortalyqta 298 adam tolyqqandy áleýmettendirýden ótip, 3490 adam advokat jáne psıhologtyń konsýltatsııalyq kómegin aldy. Sonymen qatar agressııasy basym jandarmen bólek jumys júrip jatyr. Az ýaqyttyń ishinde qoǵamdyq ortalyq turmystyq zorlyq-zombylyq qurbany bolǵan áıelderdi ómirge qaıta beıimdeý alańyna aınaldy», - dedi alıans basshysy.

Onyń málimdeýinshe, Qazaqstannyń Azamattyq alıansy eldegi qoǵamdyq máselelerge beı-jaı qaramaıdy jáne zorlyq kórsetýshilerge jazany qatańdatýǵa arnalǵan zań jobasyn qoldaıdy.

Eske salsaq, Memleket basshysy bıylǵy halyqqa Joldaýynda otbasynda oıran salatyndarǵa jazany kúsheıtý kerektigin aıtqan edi.