«Jubanovtan - Abaıǵa» ǵylymı-tanymdyq ekspedıtsııasy jolǵa shyǵady
Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy «Qazaqstannyń kıeli jerleriniń geografııasy» jobasy negizinde 1-9 maýsym aralyǵynda ǵylymı ekspedıtsııa jumysyn bastaıdy. Zertteýshiler Aqtóbe - Nur-Sultan - Pavlodar - Semeı - Jıdebaı - Qarqaraly - Baıanaýyl - Qaraǵandy - Nur-Sultan - Aqtóbe baǵytyn qamtıdy. Bul ekspedıtsııa Q.Jubanov atyndaǵy Aqtóbe óńirlik memlekettik ýnıversıtetiniń 85 jyldyǵy men Abaı Qunanbaevtyń týǵanyna 175 jyl tolýyna oraı uıymdastyryldy. Bul baǵyt Aqtóbe pedagogıkalyq ınstıtýtynyń rektory Muhtar Arynnyń ǵylymı ekspedıtsııasyna arnaıy josparlanǵan bolatyn.
«Muhtar Aryn bul ekspedıtsııany 1995 jyly quryp, bastaǵan isti aıaqtaı almady. Bul joly ýnıversıtet basshylyǵy qoldap, ıgi isti jalǵastyrýǵa múmkindik paıda boldy. Sapar kezinde ǵylymı zertteýshiler ózara baılanys ornatyp, maqalalar jazady, jınaq shyǵady. Ári beınefılm túsirilip, tanymdyq týyndylar kópshilikke usynylady. Abaı Qunanbaev, Muhtar Áýezov, Máshhúr Júsip Kópeevtiń beıitine de baramyz. Bul - magıstranttar men doktaranttar úshin úlken múmkindik», - dedi oblystyq «Rýhanı jańǵyrý» jobalyq keńsesiniń úılestirýshisi Dáýlet Ábenov.
Aıta keteıik, delegatsııa quramynda «Abaıtaný jáne ulttyq rýhanııat» ǴZO jetekshisi, f.ǵ.d, professor Abat Pangereev, oblystyq «Rýhanı jańǵyrý» jobalyq keńsesiniń úılestirýshisi Dáýlet Ábenov, «Qazaq ádebıeti» kafedrasynyń oqytýshysy, magıstr Aıbat Ómirbaev, Marketıng ortalyǵynyń dırektory Janna Ábildaeva, «Fılologııa» mamandyǵynyń 2-kýrs magıstranty Gúlaına Іzmuqanova, Pedagogıka jáne psıhologııa ǵylymdarynyń PhD doktory, aǵa oqytýshy Jandarbek Imanshıev, «Fılologııa» mamandyǵynyń 2- kýrs magıstranty Bekarys Oljabaev bar.
Ekspedıtsııa baǵdarlamasy Qazaqstannyń rýhanı muralarynyń obektilerine barýdy jáne zertteýdi kózdep otyr. Qatysýshylar ýnıversıtetterge, ǵylymı ortalyqtarǵa, meshitterge, medreselerge, eskertkishterge, murajaılarǵa jáne basqa da tarıhı oryndarǵa barady. Ýnıversıtet delegatsııasy Abaı Qunanbaevtyń murasyn talqylaýǵa jáne zerdeleýge arnalǵan sharalarǵa qatysady.