Jubanov ýnıversıteti batys óńirdegi IT habqa aınalady
Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın búgin Q.Jubanov atyndaǵy Aqtóbe óńirlik ýnıversıtetinde boldy. Ol ýnıversıtet janyndaǵy tehnoparktiń qyzmetimen tanysyp, óńirdiń IT qaýymdastyǵymen jáne stýdenttermen kezdesý ótkizdi. Kezdesý barysynda mınıstrlik, vedomstvoǵa qarasty uıymdar, ýnıversıtet jáne óńir arasyndaǵy ózara is-qımyl máseleleri talqylandy.
«IT salasy – Jubanov ýnıversıtetiniń damý strategııasynyń basym baǵyttarynyń biri. Batys óńirdiń IT ortalyǵyna aınalýǵa barlyq múmkindigimiz bar. Oqý orny IT mamandardy 1999 jyldan bastap daıarlap keledi. Bıyl 285 maman oqý bitiredi. Ǵylymı jumystar men stýdenttik startap jobalar jolǵa qoıylǵan. Biz IT salasyndaǵy óńirlik habqa aınalýǵa, jastar úshin kreatıvti keńistik usynýǵa daıynbyz», dep atap ótti Q. Jubanov atyndaǵy ARÝ rektory Laýra Qarabasova.
Nátıjesinde Astana Hub Halyqaralyq IT-startaptar tehnoparkiniń qyzmetin Q.Jubanov atyndaǵy Aqtóbe óńirlik ýnıversıtetiniń aýmaǵynda keńeıtý boıynsha kelisim ornatyldy. Osylaısha, Q.Jubanov atyndaǵy Aqtóbe óńirlik ýnıversıtetinde tehnologııalyq kásipkerlikti dáripteýge baǵyttalǵan túrli is-sharalardy ótkizýge, Astana Hub bilim berý baǵdarlamalaryn qoldanýǵa jáne Qordyń ınkýbatsııalyq jáne akseleratsııalyq baǵdarlamalaryna qatysýǵa jol ashyldy.