Jitiqara qalasyn damytýdyń bes jyldyq keshendi jospary bekitildi

<p>Úkimet Jitiqara qalasynyń 2023-2027 jyldarǵa arnalǵan áleýmettik-ekonomıkalyq damýynyń keshendi josparyn bekitti, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Jitiqara — Qostanaı oblysy Jitiqara aýdanynyń ortalyǵy. 1936 jyly qurylǵan.

Ol keńestik qala-zaýyt saıasaty paıda bolǵanǵa deıin ónerkásiptik qonys retinde qurylǵan.

Qala quraýshy kásiporyndar: «Qostanaı mıneraldary» AQ jáne «Komarov taý-ken kásiporny» JShS.

Negizgi mamandanýy — asbest, quramynda altyn bar ken óndirý, «Dore» qorytpasyn óndirý.

Josparda 13,4 mlrd teńgege 45 uıymdastyrý jáne iske asyrý sharasy kózdelgen, olar respýblıkalyq, jergilikti bıýdjet jáne jeke ınvestıtsııa tartý sheńberinde qarjylandyrylady.

4 tarmaqty iske asyrý jeke ınvestıtsııa esebinen josparlanǵan (1,1 mlrd teńge nemese qarjylandyrýdyń jalpy somasynyń 8,3%).

Ekonomıkanyń naqty sektory blogy sheńberinde usaqtaý-suryptaý keshenin salý jáne Arshylysaı ken ornynda granıt óndiretin jobalardy iske asyrý kózdeledi.

Sonymen qatar, kásipkerlikti damytý, sonyń ishinde sýpermarket ashý jáne astyq úshin orama jelisin iske qosý josparlanǵan. 

Jańa jumys oryndaryn ashýdy kózdeıtin 9 baǵdarlama qarastyrylǵan.

Mysaly, osy baǵdarlamalar sheńberinde jyl saıyn keminde 28 adam qatysatyn jastar praktıkasyn uıymdastyrý, jyl saıyn keminde 26 adam áleýmettik jumys ornyna ornalastyrylady.

Sondaı-aq, azamattardy ártúrli jas sanattarynda jumysqa ornalastyrý úshin «Birinshi jumys orny» jáne «Kúmis jas» jobalary iske asyp jatyr. 

Turǵyn úı-kommýnaldyq ınfraqurylymdy jańartý jobalaryn qarjylandyrýǵa basty nazar aýdarylady.

Atap aıtqanda, buǵan gaz tutynatyn energetıkalyq qondyrǵy salý, sý jylytý qazandyqtaryn qaıta jańartý, 1,6 km jylý jelilerin jańǵyrtý, sondaı-aq 10,7 km gaz taratý jelileri men sýmen jabdyqtaý jelilerin salý kiredi.

Densaýlyq saqtaý salasynda emhana men aýdandyq aýrýhanany qaıta qurý josparlanǵan. 

Al mádenıet pen buqaralyq sport úshin Mádenıet saraıyna kúrdeli jóndeý júrgizilip, sport alańdary ornatylady.

Ekologııa jáne tabıǵat paıdalaný máselesine erekshe nazar aýdarylady.

Bul blokta birneshe mańyzdy máselelerdi sheshý sharalary qarastyrylǵan, ol — Shortandy ózeniniń arnasyn tazartý, sondaı-aq ruqsat etilmegen polıgondardy joıý.