JRVI-diń 544 myńnan astam jaǵdaıy tirkeldi - DSM

<p>ASTANA. KAZINFORM &ndash; Qyrkúıekte respýblıkada jiti respıratorlyq vırýstyq ınfektsııanyń 544 myńnan astam jaǵdaıy tirkeldi. Bul týraly DSM Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova aıtty.</p>

«JRVI men tumaýdyń jyl saıynǵy epıdemıologııalyq maýsymy bastaldy. Jyl saıyn respýblıkada JRVI-dyń 4-5 mln jaǵdaıy jáne tumaýdyń 2 myńǵa deıingi jaǵdaıy tirkeledi. Mınıstrlik tumaý men JRVI-diń epıdemıologııalyq jaǵdaıyna apta saıyn monıtorıng júrgizedi. Bıyl qyrkúıekte respýblıkada JRVI-diń 544 368 jaǵdaıy tirkeldi. Ótken jyldyń qyrkúıek aıymen salystyrǵanda 27 paıyzǵa tómen ekeni baıqalady», - dedi Sarhat Beısenova Ortalyq saılaý komıssııasyndaǵy brıfıngte.

Onyń dereginshe, sońǵy aptada respýblıkada JRVI-diń 171 532 jaǵdaıy tirkeldi. Ótken aptamen salystyrǵanda JRVI jaǵdaıy 9 paıyzǵa tómendegen.

«Tumaý jaǵdaılary tirkelgen joq. Tumaýdan basqa Qazaqstanda tumaýǵa jatpaıtyn vırýstar da taralýda. Basqa da tumaý emes ınfektsııalarǵa qyrkúıek aıynda 388 synama zertteldi. 137 synamada oń nátıje anyqtaldy. Onyń ishinde rınovırýs – 49 (oń nátıjelerdiń 36%-y), bokavırýs – 35 (26%), paragrıpp – 25 (18%), adenovırýs – 17 (12%), RS vırýsy – 7 (5%), basqa vırýstar - 4 (3%)», - dedi komıtet tóraǵasy.