Josparly shekaralyq operatsııa kezinde ustalǵandardyń isi sotta qaralyp jatyr

ASTANA. QazAqparat - Memlekettik shekaranyń barlyq shebi boıynsha, onyń ishinde Qazaqstan-Qyrǵyzstan shekara ýchaskesinde júrip jatqan josparly operatsııanyń bastalǵanyna jeti kún ótti. Osy ýaqyt aralyǵynda júzdegen zańbuzýshylyq anyqtalyp, ótkizý beketindegi baqylaý kúsheıtildi, dep habarlady Habar24.kz.

Josparly shekaralyq operatsııa bastalǵaly beri Qordaı ýchaskesine jaýapty sarbazdar 223 adamdy ustaǵan. Olar kóshi-qon zańnamasyn jáne shekaralyq rejımdi buzǵan.

Ustalǵandardyń basym bóligi dálirek aıtsaq, 142 adam Ózbekstannyń azamaty, 57 adam Qyrǵyz Respýblıkasynan, 8 adam - Tájikstannyń týmasy. Zań talaptaryn saqtamaǵandardyń arasynda Túrkııa, Reseı, Ázerbaıjan jáne Aýǵanstan azamattary da bar. Olardyń isi qazir sotta qaralyp jatyr. Ustalǵandardyń basym bóligine aıyppul salynsa, birqatary sot úkimimen elden shyǵarylýy múmkin.
Qordaı aýdanynda jalpy 18 myńǵa tarta sheteldik ýaqytsha tirkeýde tursa, onyń 8 myńǵa jýyǵy - Qyrǵyzstan azamattary.

Aýdandyq kóshi-qon qyzmetiniń málimetinshe, sońǵy 9 aıda 145 adam el aýmaǵynan shyǵarylsa, sonyń jartysy kórshi eldiń turǵyndary eken.