Jospardan tys tekseremiz: Oralda mektep-balabaqsha basshylaryna UQK atynan jalǵan habarlama kelgen

<p>ORAL. KAZINFORM &ndash; Oral qalasynda mektepter dırektorlary men balabaqsha meńgerýshilerine jalǵan aqparat tarady.</p>

Belgisiz bireýler WhatsApp messendjeri arqyly Oral qalasy ákiminiń, sondaı-aq bilim bólimi basshylarynyń atynan UQK-nyń habarlamasy delingen hatty jibergen.

Onda Oral qalasy bilim bóliminde tekserý júrgizilip, qylmystyq is qozǵalǵany aıtylǵan.

Oral qalasy bilim berý bóliminiń baspasóz hatshysy Elmıra Nuǵmanova mundaı jaǵdaıdyń oryn alǵanyn rastady.

«Bastapqyda osyndaı habarlama bilim bólimi basshysynyń, sodan keıin orynbasarynyń atynan ketken. Sosyn Oral qalasy ákiminiń de atynan barǵan. Sol boıda mektep dırektorlary men balabaqsha meńgerýshilerine bul aqparatty alaıaqtardyń taratyp otyrǵany aıtyldy. Óıtkeni kórsetilgen nómirler ol kisilerdiń atyna tirkelmegen. Sondyqtan olarǵa jaýap bermeı, buǵattap tastaý kerektigi eskertildi. Sonymen qatar UQK departamentine de habarlama jasaldy»,-dedi E.Nuǵmanova.

Foto áleýmettik jeliden

Eske sala keteıik, budan buryn alaıaqtar BQO ákiminiń atynan jalǵan habarlama taratqanyn jazǵan bolatynbyz.